DILI,18 novembru 2020 (TATOLI)—Prezidente Konsellu Nasionál Juventude Timor-Leste (CNJTL-sigla portugés), Maria Dadi Soares Magno, apela ba juventude tomak iha territóriu Timor-Leste atu para fuma sigaru tanba sei hamosu moras kroniku sira.
“Joven tenke iha saúde di’ak, joven tenke forte, no tenki sai autór ba transformadór ba sosiedade, labele lakon tempu ho sigaru, tanba fuma barak afeta ba saúde,” nia hato’o asuntu ne’e ba jornalista sira iha Largo Lecidere Dili durante marsa saudavél, kuarta ne’e.
Lidér ba foinsa’e sira ne’e rekoñese katak joven idaidak maka tenke iha desizaun mutua ba nia an atu oinsá prevene an husi fuma sigaru.
No nia alerta katak joven ho idade 15 to’o 30 ekonomikamente sei depende ba inan-aman.
“Bainhira iha osan oituan favór rai hamutuk hodi halo negósiu kiik ruma nune’e bele muda moris iha futuru, no deside labele sosa sigaru tanba sei habadak moris,” tenik tan.
Bazeia ba relatóriu peskiza globál foinsa’e 2019 hatudu labarik ho tinan 13-15 maka fuma ona sigaru, entre adulesente 30.9%, husi totál ne’e 42% ba mane no 21% ba feto.
Iha estudante 67% mak sofre husi fuma sigaru pasivu iha uma, no 71% mak sofre fuma sigaru pasivu iha fatin públiku.
Tabaku fatór risku prinsipál ba moras hanesan atakasaun fuan, hipertensaun, stroke, króniku respiratóriu, asma, kankru, abortu moris prematura no seluk tan.
Jornalista :Felicidade Ximenes
Editór :Agapito dos Santos
