DILI, 19 novembru 2020 (TATOLI)—Governu liuhosi Ministru Ensinu Superiór Siénsia no Kultura (MESSK), Longuinhos dos Santos, kinta ne’e deklara iha tinan 2021 sei fó bolsa estudu ba dosente sira husi universidade públiku no privada hodi hasa’e grau akadémiku husi Lisensiatura (S1) ba mestradu (S2).
“Ida ne’e mak polítika Governu nian hakarak hasa’e nivel akadémika dosente sira nian husi nivel lisensiatura ba mestradu,” dehan Governante durante ninia diskursu iha serimonia graduasaun ba estudante finalista IOB, iha Kampus IOB Fomento Dili.
Notísia Relevante :ANAAA sujere MESSK fó bolsa estudu ba dosente
Bolsa estudu ne’e hodi atinje kualidade institusionál no abilidade dosente sira nune’e bele hanorin estudante sira ho diak liután.
“Ida ne’e mak polítika VIII Governu nian ne’ebé MESSK trasa ona no sei implementa iha 2021 para bele hahú ona tulun Intituisaun Ensinu Superiór Públiku no Privada 14 ne’ebé akreditadu ona iha kualidade akadémiku nian,” nia dehan.
Entretantu, Reitór IOB Augostu da Conceição Soares, orgullu ho polítika Governu Konstitusionál da ualu ne’e no espera katak bele implementa ho duni iha tinan oin.
Notísia Relevante :MESSK prevee millaun $6-resin ba OJE 2021
Jornalista : Tomé Amado
Editór:Agapito dos Santos
