DILI, 23 novembru 2020 (TATOLI)--Ministériu Finansa (MF) manda ona lista pagamentu subsídiu uma-kain $200 ba Banku Nasionál Komérsiu Timor-Leste (BNCTL, sigla portugés) hodi prosesa pagamentu.
“Ha’u mai enkontru ho Primeiru-Ministru hodi atualiza preparativu balun no iha enkontru ne’e ha’u atualiza kona-ba pagamentu ba uma-kain ne’ebé seidauk simu osan. Informa ba Primeiru-Ministru katak prosesu pagamentu ne’e ami haruka ona ba BNCTL,” Ministra Finansa ein ezersísiu, Sara Lobo Brites, relata ba hafoin ramata reuniaun semanál ho Primeiru-Ministru, Taur Matan Ruak, iha Palásiu Governu, segunda ne’e.
Atuál Vise-Ministra Finansa ne’e espera ministériu implementadór bele realiza ona pagamentu iha tempu badak.
“Fiar katak Ministériu Solidariedade Solidariedade Sosiál no Inkluzaun (MSSI) hamutuk ho Ministériu Administrasaun Estatál (MAE) sei organiza pagamentu iha tempu badak,” nia dehan.
Daudaun ne’e, MSSI identifika ona lista reklamante sira hamutuk 2.881 iha munisípiu 12 inklui Rejiaun Administrativa Espesiál Oé-Cusse Ambeno (RAEOA).
Reklamente loloos hamutuk 2.909, maibé esklui uma-kain 28 tanba identifikadu naran balun doubru.
Pagamentu ba reklamante sira, sei uza osan restu ne’ebé mak Governu depózita hela iha BNCTL.
Jornalista: Antónia Gusmão
Editora: Julia Chatarina
