DILI, 23 novembru 2020 (TATOLI)—Prezidente Repúblika, Francisco Guterres Lú Olo, liuhosi dekretu Prezidente Repúblika númeru 68/2020, halo nomeasaun ba Rui Augusto Gomes hodi asume pasta Ministru Finansa iha VIII Governu Konstitusionál.
Liuhosi nota ne’ebé Agência TATOLI asesu, Konstituisaun Repúblika Demokrátika Timor-Leste artigu 106 númeru 2 atribui kompeténsia ba Prezidente Repúblika ba nomeasaun membru Governu, tuir proposta husi Primeiru-Ministru.
Serimónia tomada pose ba Ministru Finansa foun sei hala’o ohin, 23 novembru 2020, tuku 16.00, iha Palásiu Prezidénsiál, Nicolau Lobato.
Xefe Estadu uza nia podér konstitusional bazeia ba alinea h husi artigu 86 Konstituisaun Repúblika Demokrátika Timor-Leste ne’ebé hateten foti, fó pose no hasai membru Governu, tuir proposta Primeiru-Ministru, iha termu númeru 2 artigu 106.
Molok halo nomeasaun, liuhosi dekretu Prezidente Repúblika númeru 67/2020, Prezidente Repúblika ezonera atuál Ministru Finansa, Fernando Hanjam, tuir proposta xefe Governu.
Dekretu Prezidente Repúblika asina iha 23 novembru 2020.
Jornalista: Florêncio Miranda Ximenes
Editora: Julia Chatarina
