Kazu VD, Tribunál kondena arguidu ho pena suspensaun
DILI, 24 novembru 2020 (TATOLI)-Tribunál Distritál Dili (TDD), liuhosi desizaun aplika pena prizaun fulan-sia no suspende tinan-ida, fulan-neen ba arguidu ho inisiál AS tanba faktu prova komete krime violénsia doméstika.
Tuir produsaun prova liuhosi julgamentu-sira liu ba Tribunál haree katak, faktu ne’ebé konsta iha auto hatudu provadu hotu ne’ebé iha loron 12 novembru 2019 arguidu ho lezada ANB nu’udar fen-la’en iha sira-nia rezidénsia iha Dili-laran, sira na’in-rua diskute malu tanba simu telefone hosi ema seluk kuandu arguidu rona hodi husu tuir ba lezada katak se mak telefone ba, no lezada hatán dehan ema nia parte la koñese tanba númeru telefone foun ho nune’e arguidu hirus tuku lezada, basa tan iha hasan no rasta fuuk monu ba rai.
Konsekuénsia hosi hahalok arguidu nian ne’e, lezada sente moras iha nia kotuk laran, kakorok no halo lezada hodi ba halo tratamentu iha ospitál.
Arguidu halo ho forma livre halo agresaun fízika hasoru lezada, konsidera hanesan meiu ida hodi halo moras no bubu iha lezada nia isin.
Hahalok arguidu lei bandu, nune’e arguidu hanesan autór material ho forma konsumada pratika krime violénsia doméstika tuir artigu 3,35 alínea b) hosi lei númeru 7/2010, ho forma ofensa integridade fízika simples tuir artigu 145, hosi kódigu penál Timor-Leste. Nune’e Tribunál deside aplika pena prizaun fulan-sia no suspende tinan-ida, fulan-neen.
Antes ne’e mós arguidu hetan ona kondenasaun ba kazu seluk ho krime hanesan ho pena prizaun fulan-neen, suspende tinan-ida. Tanba ne’e ba oin, arguidu labele komete tan krime seluk se komete mak sei hetan pena prizaun efetivu.
Prosesu julgamentu ne’e prezide hosi juiz Ivan Suritai, Ministériu Públiku reprezenta hosi prokuradór na’in-ida no arguidu hetan asisténsia legal hodi Defensór Públiku, Henrique Mariz.
Jornalista : Nelson de Sousa
Editór : Francisco Simões
