DILI, 25 novembru 2020 (TATOLI)–Ministru Prezidénsia Konsellu Ministru (PCM, sigla portugés), Fidelis Manuel Leite Magalahães, halo aprezentasaun ida iha reuniaun Konsellu Ministru (KM), kona-ba opsaun solusiona kestaun relasiona ho obra públika.
“Konsellu Ministru rona aprezentasaun hosi ha’u rasik kona-ba opsaun atu solusiona ba kestaun projetu hirak ne’ebé maka nia obra halo tiha uluk sein kontratu eskritu,” Ministru Prezidénsia Konsellu Ministru, Fidelis Manuel Leite Magalhães relata hafoin ramata reuniaun KM iha Palásiu Governu, kuarta ne’e.
Portavóz Governu ne’e esklarese, inisiativa ne’e ho hanoin ida katak projetu iha natureza laiha kontratu no ikus mai kria polémika boot, entaun hosi PCM aprezenta opsaun no legalidade atu enkoraja setór privadu labele komete aktu ilegál iha futuru.
“Ida-ne’e hanesan proposta lejizlativa ne’ebé bele sulusiona situasaun atuál, maibé mós laho intensaun atu loke tan dalan atubele iha abuzu iha futuru,” Fidelis akresenta.
Tanba ne’e, iha aprezentasaun ne’e PCM rekomenda ba ministériu kompetente sira, dalan legál atubele buka solusaun ba situasaun hirak ne’ebé enfrenta.
Ba oin, ministériu hirak ne’ebé haree ba área infraestrutura rasik maka sei deside atu avansa ho rekomendasaun ne’ebé PCM hato’o ou hakarak hili solusaun seluk.
Jornalista: Antónia Gusmão
Editora: Julia Chatarina
