DILI, 25 novembru 2020 (TATOLI)-–Liuhosi sorumutuk Konsellu Ministru (KM), Governu delibera hodi propoin ba Prezidente Repúblika, Francisco Guterres ‘Lú Olo’, renovasaun Estadu Emerjénsia (EE) daualu ba loron-30.
“Renovasaun Estadu Emerjénsia ne’e aprovadu iha reuniaun Konsellu Ministru,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun KM iha Palásiu Governu, kuarta ne’e.
Portavóz Governu ne’e dehan, razaun estensaun EE tanba haree ba mudansa preokupante husi situasaun epidemiolójika no proliferasaun ba kazu rejistadu no kontájiu COVID-19 iha nível rejionál no mós mundiál, atu evita no netraliza risku propagasaun no bele proteje saúde públika no iha kbiit atu hatán ba Sistema Nasionál Saúde.
“Governu propoin ba Prezidente Repúblika katak liuhosi renovasaun Estadu Emerjénsia permite atu suspende ka limita direitu kona-ba sirkulasaun internasionál, sirkulasaun no fiksasaun rezidénsia no rezisténsia,” Fidelis subliña.
EE dahitu hahú husi tuku 00:00 loron 04 novembru 2020 (kuarta) no ramata iha tuku 23:59 loron 03 dezembru 2020 (kinta).
Jornalista: Antónia Gusmão
Editora: Julia Chatarina