DILI, 27 novembru 2020 (TATOLI)–Governu liuhosi Ministériu Koordenadór Asuntu Ekonómiku (MKAE) selebra akordu ida ho parseiru dezenvolvimentu sira hanesan Programa Nasaun Unida ba Dezenvolvimentu (UNDP, sigla inglés) no Programa Ai-han Mundiál (WFP, sigla inglés) ba implementasaun programa Cesta Bázika.
“Cesta Bázika hahú implementa no durante períodu ne’e hetan krítika maka’as hosi públiku, atu hatan ba situasaun ne’e presiza apoia hosi parseiru dezenvolvimentu ho objetivu atu hametin monitorizasaun no garante direitu sira ne’ebé iha programa nia laran bele to’o ba benefisiáriu sira,” Ministru Koordenadór Asuntu Ekonómiku, Joaquim Amaral, relata hafoin asina akordu iha salaun enkontru TradeInvest, sesta ne’e.
Aleinde ne’e, nota mós UNDP iha esperiénsia kona-ba inkéritu ba impaktu sosiu ekonómiku.
“Inkéritu sei realiza iha fevereiru no marsu 2021, ita bele dehan programa ne’e ninia impaktu sei iha. Inkéritu ne’ebé halo sei oferese ba Governu, informasaun kredível hosi ekipa independente,” nia akresenta.
Tuir governante ne’e, hafoin programa Cesta Bázika ramata, Governu bele haree ninia impaktu iha sosiedade.
“Programa monotorizasaun ne’e lansa iha fevereiru nia laran, ho hanoin katak oportunidade di’ak tanba ita-nia parseiru aseita Estadu Timor-Leste nia konvite hodi partisipa iha programa Governu, tanba WFP iha esperiénsia di’ak tebes iha mundu no susesu iha distribuisaun ai-han,” nia informa.
Iha fatin hanesan, reprezentante UNDP iha Timor-Leste, Munktuya Altangerel, hateten tinan ne’e konsege halo ona avaliasaun impaktu sosiu-ekonómiku COVID-19 iha Timor-Leste, tanba ne’e akordu ne’ebé asina ho MKAE hanesan kontinuasaun ba faze daruak.
“Ho orsamentu ne’ebé ami iha, sei hala’o avaliasaun ba komunidade ne’ebé vulnerável liu, uma-kain vulnerável tuir ami nia avaliasaun iha 46%,” nia hatutan.
UNDP hamutuk ho WFP sei halo monitorizasaun no avaliasaun hamutuk ho akadémiku sira halo serbisu voluntáriu.
“Nune’e, akadémiku sira iha kapasidade halo monotorizasaun ba implementasaun programa Cesta Bázika,” Reprezentante rezidente ne’e dehan.
Ofisiál WFP iha Timor-Leste, Antónia Soriani, hateten programa mundiál ne’e hakarak fó asisténsia ba Governu.
“Asina akordu ba asisténsia téknika WFP ba Governu. Ida ne’e hanesan ami-nia kontribuisaun, daudaun ami elabora hela padraun atu implementa Cesta Bázika, ami dezeña hodi halo prátika di’ak liu ba implementasaun programa ne’e, tanba globalmente WFP mak iha esperiénsia ba programa sira hanesan ne’e,” nia esplika.
Jornalista: Antónia Gusmão
Editora: Julia Chatarina
