DILI, 27 novembru 2020 (TATOLI)—Governu liuhosi Ministériu Transporte no Komunikasaun (MTK) planea kria dekretu-lei ida hodi regula rede esternál sira iha área telekomunikasaun.
Relasiona ho kestaun ne’e, Ministru Transporte no Komunikasaun, José Agustinho da Silva, halo enkontru ho Primeiru-Ministru (PM), Taur Matan Ruak, hodi informa progresu serbisu ne’ebé mak MTK halo ona inklui inisiativa lei.
“Ha’u mai hasoru malu ho Primeiru-Ministru hodi relata progresu serbisu ministériu nian no ministériu sei kria dekretu-lei hodi regula rede esternál iha telekomunikasaun,” Ministru informa hafoin enkontru ho Xefe Governu, iha Palásiu Governu, sesta ne’e.
Notísia Relevante: Kazu Telemor-Elite Computer, MP akuza arguidu-sira ho krime burla informátika no fraude fiskál
Tuir membru ezekutivu ne’e, to’o agora Governu seida’uk iha instrumentu legál ruma hodi regulariza rede hosi li’ur.
“Tanba ne’e, iha mandatu VIII Governu Konstitusional, Ministériu Transporte no Komunikasaun hakarak aselera lalais instrumentu legál sira,” nia akresenta.
Tuir governante ne’e, inisiativa lei importante, nune’e iha futuru ajénsia no kompañia sira ne’ebé opera iha Timor-Leste nu’udar Internet Service Provider (ISP), tenke iha instrumentu legál ruma atu regulariza.
“Nune’e, sira-nia aktu iha duni korridór dekretu-lei ne’ebé maka iha. Bainhira dekretu-lei iha ona, bele regula, nune’e empreza sira hala’o atividade mak viola regra ruma, bele aplika lei ne’ebé vigora,” nia subliña.
Jornalista: Antónia Gusmão
Editora: Julia Chatarina
