DILI, 27 novembru 2020 (TATOLI)—Populasaun Timor-Leste hamutuk pursentu 47.1(%) sei kontinua sofre problema má nutrisaun, divulga dadus husi Ministériu Saúde
Ministra Saúde, Odete Maria Freitas Belo, hateten dadus má nutrisaun tinan 2020 fó sai husi totál populasaun Timor-Leste billaun 1.2-resin ne’e, 47.1 % sei kontinua enfenta problema má nutrisaun.
Notísia Relevante :UE rekoñese kompromisu TL kombate má nutrisaun
Bazeia ba rezultadu peskiza tinan 2020 ne’e indika Timor-Leste seidauk livre husi problema má nutrisaun tanba seidauk priénse kriteria ne’ebé fó sai husi Organizasaun Mundiál Saúde (OMS) ho persentajen 13 to’o 15.
Labarik sira ho raes badak krekas iha tinan 2010 58.1%, iha tinan 2013 50.2% no iha tinan 2020 hamutuk 47.1%.
“Krekas iha tinan 2010 18.6% no tinan 2013 11.0% depois 2020 pursentu 8.6 signiifka krekas tun, agora todan menus ne’e iha tinan 2010, 44.7% no tinan 2013, 37.7% depois iha 2020 32.1%,” dehan Odete Maria Freitas Belo, bainhira halo lansamentu ba rezultadu peskiza aihan no nutrisaun Timor-Leste 2020 no estratejia nasionál aihan seguru iha Palasiu Sinzas Caicoli, sesta ne’e.
Governante ne’e dehan ho rezultadu peskiza ne’e sei tulun Governu atu oinsá kria planu no programa para redúz númeru problema má nutrisaun iha rai-laran.
”Banhira ita atu halo aproximasaun ba má nutrisaun ida ne’e dahuluk ministériu relevante sira mós asesu ba dokumentu ne’ebé mak ita iha no asesu ba iha planu estratejiku Ministériu saúde nian para alina nafatin ho ministériu sira seluk hanesan Minsitériu Agrikultura, Ministériu Edukasaun, Ministériu Turizmu Komérsiu no Indústria, hodi servisu hamutuk atu haree ba idaidak nia parte para hodi bele redúz liután ba iha má nutrisaun ida ne’e,” esplika Ministra Saúde.
Servisu integradu sira ne’ebé daudaun ne’e servisu iha postu sáude, sentru saúde, ospitál referál no nasionál iha papel importante atu promove nafatin kona-ba programa ai-han nutrisaun ba labarik no inan isin rua sira atu konsumu ai-han ne’ebé iha nutrisaun aas.
Notísia Relevante :ONU kompromete fahe esperiénsia globál kombate má nutrisaun iha Timor-Leste
Jornalista : Felicidade Ximenes
Editór :Agapito dos Santos
