DILI, 30 novembru 2020 (TATOLI)—Konsellu Estadu (KE) no Konsellu Superiór Defeza no Seguransa (KSDS) rekomenda Prezidente Repúblika, Francisco Guterres ‘Lú Olo’, atu kontinua estende Estadu Emerjénsia (EE) ba daualuk hodi halo prevensaun transmisaun lokál surtu COVID-19 iha Timor-Leste.
Iha reuniaun konsellu rua, membru sira fó votu unanimidade, nune’e rekomenda Xefe Estadu submete pedidu autorizasaun ba Parlamentu Nasionál (PN).
“Ohin Konsellu Estadu no Konsellu Superiór Defeza Seguransa rekomenda ba Prezidente Repúblika atu fó pedidu ba Parlamentu Nasionál atu deskute no aprova autorizasaun ba Xefe Estadu atu dekreta Estadu Emerjénsia ba daualuk, ne’ebé atu aprova ka lae ne’e desizaun Parlamentu Nasionál nian,” Xefe Kaza Sivíl Palásiu Prezidensiál, Francisco Maria de Vasconcelhos, dehan hafoin konsultasaun ho konsellu rua iha Palásiu Prezidensiál, Bairro Pité, segunda ne’e.
Notísia Relevante: Xefe Estadu hahú prezide KE-KSDS ba estensaun EE daualuk
EE dahitu hahú hosi tuku 00:00 loron 04 novembru 2020 (kuarta) no ramata iha tuku 23:59 loron 03 dezembru 2020 (kinta).
Razaun pedidu ne’e atubele kontrola movimentu sidadaun iha área fronteira sira no konfinamentu obrigatóriu hodi halo prevensaun ba pandemia globál ne’e.
Xefe Kaza Sivíl afirma posibilidade ohin ka aban, haruka ona pedidu autorizasaun ba PN tanba pedidu estensaun hosi Governu ba EE daualuk ne’e laiha diferénsia ho pedidu antes ne’e.
Pedidu ne’e hanesan regra ne’ebé sei nafatin ho aplikasaun iha fleksibilidade no atividade hotu la’o tuir prátika situasaun atuál.
Antes ne’e, PN aprova no autoriza ba Prezidente Repúblika hodi dekreta dahituk.
Estensaun, Governu deside aplika EE tanba haree ba mudansa preokupante hosi situasaun epidemilójika no proliferasaun ba kazu rejistadu no kontájiu COVID-19 iha nível rejionál no mós mundiál, atu evita no netraliza risku propagasaun no bele proteje saúde públika no iha kbiit atu hatán ba Sistema Nasionál Saúde.
Jornalista: Florêncio Miranda Ximenes
Editora: Julia Chatarina
