DILI, 01 dezembru 2020 (TATOLI)–Diretór Nasionál Empregu Esteriór hosi Sekretaria Estadu Formasaun Profisionál no Empregu (SEFOPE), Filomeno Soares, hateten traballadór timor-oan na’in-162 ne’ebé liu ona iha vaga Seasonal Worker Programme (SWP) hetan ona kontaktu hosi ajénsia haat.
Traballadór sira konklui ona prosesu teste ne’ebé aplika no kompleta dokumentu, hein de’it aban atu dezloka bá Tazmánia, Austrália ho Qantas Airlines iha kuarta (02/12) tuku 08:30 dadeer.
“Sira hetan ona kontaktu hosi ajénsia haat iha Tazmánia hanesan Mountford Berries, Tasmanian Berries, Hillwood Berries no Building Berries,” Diretór Nasionál dehan ba Agência TATOLI, via telefónika, tersa ne’e.
Notísia Relevante: Kuarta, traballadór Timoroan 162 dezloka ba Australia
Traballadór sira ne’ebé atu aranka kompostu hosi mane 103 no feto hamutuk 59, ne’ebé antes ne’e pasa ona teste iha munisípiu 12 inklui Rejiaun Administrativa Espesiál Oé-cusse Ambeno (RAEOA).
Ajénsia Mountford Berries sei akumula traballadór timor-oan 10, kompostu hosi feto na’in-lima no mane lima, Tasmanian Berries traballadór na’in-83, kompostu hosi mane 54 no feto 29.
Enkuantu, ajénsia Hillwood Berries sei akumula traballadór na’in-39, kompostu hosi mane 27 no feto 12, Building Berries traballadór na’in-30, kompostu hosi mane 18 no feto 12.
Iha seremónia despedida ho traballadór sira ohin iha salaun Delta Nova, Sekretáriu Estadu Formasaun Profisionál no Empregu, Alarico de Rosário, agradese parte hotu ne’ebé envolve iha prosesu aplikasaun vaga to’o teste finál tanba bele fó apoiu másimu ba programa ne’e.
Governante ne’e apela ba traballadór sira atu kuidadu saúde, hatudu disiplina di’ak iha serbisu fatin, serbisu ho vontade no pasiénsia, nune’e bainhira fila mai Timór bele lori rezultadu pozitivu ba família.
Jornalista: Natalino Costa
Editora: Julia Chataria
