Traballadór haat kansela viajen bá Austrália tanba falla dokumentu komprovativu

DILI, 02 dezembru 2020 (TATOLI)—Diretór Nasionál Empregu Esteriór (DNEE) hosi Sekretaria Estadu Formasaun Profisionál no Empregu (SEFOPE), Filomeno Soares, hateten traballadór na’in-haat ohin kansela viajen bá Australia.

Tuir oráriu, traballadór na’in-162 ne’ebé liu ona iha vaga Seasonal Worker Programme (SWP), iha kuarta (02/12) sei dezloka bá Tazmánia, Austrália ho Qantas Airlines iha tuku 08:30 dadeer.

“Kandidatu traballadór na’in-haat la konsege  halo viajen tanba falla iha dokumentu komprovativu hanesan viza traballu Austrália mate, atestadu médiku, no   identidade, ohin bainhira sira atu sa’e bá aviaun laran sistema  rasik la simu. Tanba ne’e ohin ita haree maluk na’in-haat la konsege bá, ida-ne’e la’ós ami SEFOPE maka kansela viajen,” Diretór  ne’e dehan iha Aeroportu Prezidente Nicolau Lobato, Comoro, kuarta ne’e.

Notísia Relevante: Traballadór timor-oan na’in-162 sei serbisu iha ajénsia haat

Nia esplika, viza traballu importante, tanba ne’e kuandu mate, ajénsia ne’ebé  fó  servisu  ba traballadór sei haruka fila mai nasaun orijin.

Aleinde ne’e, kona-ba dokumentu identidade nesesáriu no importante tebes, tanba ne’e bainhira laiha Governu sei la autoriza traballadór serbisu iha Austrália, nune’e mós kona-ba atestadu médiku.

“Ita-nia traballdór balun falla iha dokumentu no ohin atu aranka maka sira  bá hatama,maibé aviaun nia sistema maka detekta dokumentu sira ne’e balun liu ona prazu.

Iha sorin seluk,  SEFOPE halo  esforsu maka ohin loron traballadór sira bele aranka.

Maski nune’e, Filomeno Soares husu ba traballadór sira labele triste tanba sei iha tan oportunidade.

“Ha’u husu maluk sira labele fuan kiik no labele triste ka pesimista ba ida-ne’e, tanba parte SEFOPE sei rezolve atu maluk na’in-haat bele hetan oportunidade iha tempu tuir mai bele bá fali,” nia fó hanoin.

Nia kompromete, SEFOPE sei ko’alia ho Governu Austrália hodi solusiona problema ne’e, nune’e ba futuru labele akontese no bele fasiita di’ak liu traballadór sira bá serbisu iha Austrália ho di’ak.

Iha fatin hanesan, traballadór ne’ebé la konsege halo viajen, Joanino Sousa, lamenta ho situasaun ne’ebé akontese.

“Ha’u hanoin SEFOPE tenke esplika ida-ne’e mai ami, ohin atu bá maka viza  mate,  ha’u hanoin presiza hadi’a jestaun sira se lae  ita bele deskonfia malu tanba lójika ema atu bá ohin maka derepente kansela tiha ne’e oinsá?,” kandidatu traballadór ne’e kestiona.

Nia haktuir, traballadór ne’ebé kanseladu viajen konsege sa’e ona aviaun no hatama sasán ba kargu aviaun

“Iha aviaun laran maka hatun fali ne’e oinsá, nusa maka orseik SEFOPE la dehan, ha’u hanoin presiza haree didi’ak tanba se lae tempu ruma mak akontese tan ema la satisfaz,” nia lamenta.

Enteratantu, tuir observasaun  Agência TATOLI iha terrenu, entre traballadór na’in-haat, ida konsege sa’e aviaun maibé la to’o minutu balun, pesoál tékniku aviaun haruka tun.

Ho situasaun ne’e, kandidatu traballadór ne’e konvida nia maluk na’in-tolu seluk hodi halo protesta ba ekipa SEFOPE inklui reprezentante Embaixada Austrália no husu klarifikasaun.

Diskusaun kuaze oras ida entre ekipa  SEFOPE inklui reprezentante Embaixada Austrália ho traballadór maibé la hetan solusaun to’o iha minutu balun Polísia halo kedan intervensaun iha aredór Aeroportu Comoro.

Situasaun ne’e, halo família hosi traballadór na’in-haat husu esplikasaun SEFOPE.

Enkuantu, traballadór na’in-haat ne’ebé la konsege halo viajen kompostu hosi mane tolu no feto ida.

Jornalista: Natalino Costa

Editora: Julia Chatarina