DILI, 02 dezembru 2020 (TATOLI)--Diretór Nasionál Empregu Esteriór (DNEE) hosi Sekretaria Estadu Formasaun Profisionál no Empregu (SEFOPE), Filomeno Soares, informa traballadór timor-oan ne’ebé ohin aranka ba Austrália hamutuk 152.
Tuir oráriu, traballadór na’in-162 ne’ebé liu ona iha vaga Seasonal Worker Programme (SWP), iha kuarta (02/12) aranka bá Tasmánia, Austrália ho Qantas Airlines iha tuku 08:30 dadeer.
“Ohin tuir loloos traballadór na’in-162 maka atu aranka, maibé balun tanba iha problema hanesan horiseik maka na’in-neen sira iha problema viza traballu mate no ohin sira la mai tuir aranka bá Austrália no iha mós na’in-haat ne’ebé ohin aranka maka kanseladu, entaun ohin totál traballadór ne’ebé aranka bá Austrália hamutuk 152,” Diretór ne’e relata iha Aeroportu Internasionál Prezidente Nicolau Lobato, Comoro, Dili, kuarta ne’e.
Notísia Relevante: Traballadór haat kansela viajen bá Austrália tanba falla dokumentu komprovativu
Traballadór sira hetan ona kontaktu hosi ajénsia haat iha Tasmánia, Austrália hanesan Mountford Berries, Tasmanian Berries, Hillwood Berries no Building Berries.
Tuir Dirijente ne’e, traballadór sira maioria pasa ona iha ezame físiku no ezame orál tuir kriteriu SWP.
Entertantu, Qantas Airlines tun iha Aeroportu Comoro maizumenus tuku 6:30 dadeer.
Jornalista: Natalino Costa
Editora: Julia Chatarina
