DILI, 03 dezembru 2020 (TATOLI)–Ministériu Administrasaun Estatál (MAE) submete ona dadus populasaun hamutuk millaun 1,5 ba Ministériu Koordenadór Asuntu Ekonomia (MKAE) atu simu produtu Cesta Bázika.
“Dadus ami fó ona ba Ministériu Koordenadór Asuntu Ekonómika hamutuk millaun 1,5, maibé agora kabe ba ministériu implementadór,” Ministru Administrasaun Estatál, Miguel de Carvalho informa ba Agência TATOLI, foin lalais ne’e, iha Pálasiu Governu.
Ministériu implementadór ba programa Governu ne’e mak he hanesan Gabinete MKAE, Ministériu Turizmu, Komérsiu no Indústria (MTKI), Ministériu Agrikultura no Peska, Sekretaria Estadu Kooperativa (SEKoop), Sekretaria Estadu Ambiente (SEA) inklui Autoridade Rejiaun Administrativa Espesiál Oé-cusse Ambeno (RAEOA).
Antes entrega dadus ba ministériu responsável, MAE halo ona verifiaksaun diretamente ho xefe suku no xefe aldeia sira, ne’ebé la rejistu foun tanba bazeia dei’t ba kartaun ficha família ne’ebé rejista to’o loron 11 maiu 2020.
“Autoridade lokál sira verifika filafali ba kada ficha família katak xefe família ida iha membru hira,” nia akresenta.
Aleinde ne’e, MAE halo verifikasaun hosi nível aldeia, suku, munísipiu to’o nível nasionál
Entertantu, Governu liuhosi ministériu implementadór sira hahú fahe ona Cesta Bázika ba munisípu balun no daudaun hahú preparasaun atu fahe mós voucher ba populasaun sira iha sentru sidade sira inklui iha kapitál Dili.
Ba distribuisaun voucher hodi troka iha loja indikadu, sei prepara hosi MTKI.
“Hein sira prepara voucher no sei serbisu hamutuk fali ho Ministériu Administrasaun Estatál atu ami bele distribui voucher sira ba xefe suku no xefe aldeia sira, atubele fahe tutan fali ba komunidade sira atu utiliza foti produtu Cesta Bázika iha loja sira ne’ebé MTKI halo ona kontratu,” governante ne’e akresenta.
Jornalista: Florencio Miranda Ximenes
Editora: Julia Chatarina
