DILI, 04 dezembru 2020 (TATOLI)—Espoza Prezidente Repúblika, Cidalia Nobre Mouzinho Guterres, hateten família nu’udar fatin edukasaun dahuluk ba labarik sira antes tama ba iha ensinu pre-eskolár ka eskola infantíl.
Nia dehan asuntu ne’e, bainhira fó graduasaun ba estudante finalista pre-eskolár Santa Terezinha Menino Jesus Bedois Becora hamutuk ema na’in 45 sesta ne’e.
Notísia Relevante:MEJD fó graduasaun ba estudante pre-eskolár Bairru-Pité
“Edukasaun infantíl hahú husi uma laran tanba ne’e inan-aman sira mak ema primeiru sai professora, mestre, doutora no jestór ida di’ak atu eduka oan sira oinsá bele hatene didiak edukasaun, maibé inan aman sira mós tenke komunika di’ak ho profesora sira atu bele garante futuru ida di’ak ba labarik sira,” dehan nia.
Nia rekoñese prosesu katak prosesu aprendizajen iha eskola infantíl sira la’ós fasil tanba hanorin labarik sira ho tinan kiik.
Tanba ne’e nia dehan professór ka professora sira ne’ebé hanorin ho duni kapasidade no karakteristika pasensia nune’e bele komprende situasaun no kondisaun labarik sira-nian.
“Ohin ita hotu bele asiste pasu dahuluk ba labarik sira iha jardin infantíl ne’e termina sira-nia kursu liuhusi serimonia graduasaun, ne’e motivasaun di’ak ida ba sira atu iha nafatin vontade bele partisipa iha prosesu nivel edukasaun ba oin,”Cidalia hateten.
Iha parte seluk, Diretór Jerál Ensinu Pre-Eskolár Ministériu Edukasaun Juventude no Desportu (MEJD), Apolinário Serpa Rosa, dehan, edukasaun hotu-hotu ninia aliserse maka ensinu pre-eskolár, tanba ne’e, parte hotu tantu Governu no inan-aman tenki investe didiak ba oan sira iha ensinu pre-eskolár.
Nune’e mós Koordenadora Ensinu Pre-eskolár Santa Terezinha Menino de Jesus Imelda Merrys Mella, informa eskola ne’e iha profesór no profesora na’in neen kompostu husi madre na’in rua no profesór na’in haat seluk ho estatutu kontratadu.
Ikus liu reprezentante inan aman graduadu, Paul Mendonça, agradese ba eskola tanba hanorin no akompaña estudante sira to’o hetan graduasaun.
“Ami laiha buat diak ida ba ita bo’ot sira maibé ho ami-nia orasaun sei akompaña ita bo’ot sira,” katak nia.
Notísia Relevante:Ensinu pre-eskolár forma labarik sira koñese edukasaun
Jornalista : Tomé Amado
Editór:Agapito dos Santos
