DILI, 10 dezembru 2020 (TATOLI)—Proposta Orsamentu Jerál Estadu 2021 ne’ebé aloka ba Ministériu Agrikultura no Peska (MAP) ho totál $31.964,258 inklui $5,177,675 ba planu rekuperasaun ekonomia hetan ona aprovasaun husi Parlamentu Nasionál, kinta ne’e.
Deputadu sira aprova OJE 2021 ba MAP ne’ebé lideradu husi Ministru Pedro dos Reis, ho votus a-favór 39 kontra no abstensaun 0.
Notísia Relevante :OJE 2020-2021, MAP Fó Prioridade ba Hasa’e Produsaun Ai-han
“Ho nune’e orsamentu bá Ministériu Agrikultura no Peska ne’e pasa,” prezidente Parlamentu Nasionál, Aniceto Longuinhos Lopes Guterres, anunsia iha plenária Parlamentu Nasionál, kinta (10/12).
MAP sei ezekuta ba kategoria saláriu no vensimentu $4,134,585, bens (sasán) no servisu $14,543,381, kapitál menór $9,763,292, kapitál dezenvolvimentu $2,373,000 no transférensia publika $1,150,000.
Entretantu, bazeia bá livru 2 (Planu Asaun Anuál) previstu medida prinsipál setoriál ba tinan fiskál 2021 mak promove aumentu sustentável iha produsaun no produtividade ho diversifikasaun produsaun agríkola.
Nune’e mós kontribui hodi melloria asesu ba merkadu no valór akresentadu sira, asegura jestaun no prezervasaun rekursu naturál no implementa polítika jéneru.
Medida prinsipál ikus liu mak promove boa-Governasaun no jestaun institusionál iha ministériu nian, fortalese instituisaun no eleva kapasidade rekursu umanu.
Jornalista :Antónia Gusmão.
Editór :Agapito dos Santos
