DILI, 10 dezembru 2020 (TATOLI)—Parlamentu Nasionál (PN) iha kinta ne’e aprova ona Orsamentu Jerál Estadu (OJE) 2021 ba Ministériu Ensinu Superiór Siénsia no Kultura (MESSK) ho totál millaun $6.320.415.
Reprezentante povu ih PN aprova osan ba ministériu ne’e ho votus afavór 44 kontra 0 no abtensaun 0 durante diskusaun espesialidade OJE 2021.
Notísia Relevante :MESSK prevee millaun $6-resin ba OJE 2021
Husi verba orsamentu ne’e sei aloka ba saláriu vensimentu millaun $1.893.391, bens no servisu millaun $3.519.590, kapitál menór $292.434 no tranferénsia públika $ 615.000.
Ministru Ensinu Superiór Siénsia no Kultura, Longuinhos dos Santos, hateten orsamentu ne’e sei ezekuta ba asuntu Komisaun Nasionál ba UNESCO iha Timor-Leste, desiminasaun no promosaun arte no kultura, boa-Governansaun no jestaun institusionál hodi dezenvolve ensinu superiór iha rai-laran.
“Orsamentu ne’ebé mak hetan ona aprovasaun husi deputadu sira iha debate espesialidade ne’e fó ona biban ba MESSK atu alkansa ninia planu prioridade sira hodi nune’e bele hasa’e diak liután kualidade instituisaun ensinu superiór sira nian no mós hadia kualidade dosente sira nian iha nasaun ne’e,”Governante ne’e dehan iha Parlamentu Nasionál, ohin.
Notísia Relevante :2021, MESSK planea oferese bolsa estudu ba dosente
Jornalista : Tomé Amado
Editór :Agapito dos Santos
