DILI, 14 dezembru 2020 (TATOLI)–Prezidente Institutu Petróleu no Jeolojia (IPG, sigla portugés IPG), Gabriel Gaspar Aparício de Oliveira, hateten daudaun ekipa institutu hahú halo estudu identifikasaun hodi halo perfurasaun ba bee-moos iha suku Cribas, postu administrativu Manatuto, munisípiu Manatuto.
“Kona-ba bee-moos, oras ne’e ita-nia aquíferu halo hela perfurasaun iha Crisbas ne’ebé foin ba dahuluk halo estudu fulan-rua, ita identifika hetan bee, tanba ne’e bainhira fura maka bee sai maka sei benefisia 3.000 populasaun,” Prezidente IPG informa ba Agência TATOLI iha Orchid Room Timor Plaza, segunda ne’e.
Nia haktuir, antes ne’e populasaun la hanoin hetan katak iha rai okos iha bee maibé hafoin IPG halo identifikasaun maka deteta.
“Ita halo perfurasaun hodi rezolve kestaun bee ba komunidade, karik perfurasaun ne’ebé ami halo ne’e susesu,” nia akresenta.
Tuir Gabriel, IPG ninia knaar maka halo identifikasaun iha poténsia bee moos to’o faze perfurasaun, enkuantu kona-ba distribuisaun bee kabe ba kompeténsia instituisaun seluk.
Aleinde ne’e, institutu kontinua aposta servisu no funsaun ne’ebé foku ba rekursu petróleu no kompila dadus.
“Ita sei haree filafali oinsá halo intrepretasaun ba poténsia sira ne’ebé maka iha hanesan petróleu no gás,” nia hatutan.
Iha tinan 2021, IPG sei kontinua nafatin halo estudu ba risku jeolójiku ho mapa subtitividade.
“Ita kontinua to’o iha risku rai halai afeta iha parte ne’ebé, estraga sasán hira no saida de’it, afeta ba estrada no uma hira. Entaun ida-ne’e iha faze tuir mai ne’ebé institutu sei halo estudu,” nia dehan.
Jornalista: Natalino Costa
Editora: Julia Chatarina
