BAUCAU, 17 dezembru 2020 (TATOLI)—Ministru Adminstrasaun Estatál (MAE), Miguel Perreira de Carvalho, informa ba autoridade lokál sira iha Munisípiu Baukau katak iha tinan oin (2021) ne’e Governu sei halo reabilitasaun ba sede suku hamutuk 250 iha teritóriu Timor-Leste laran tomak.
Miguel Perreira de Carvalho hatutan, hosi prosesu reabilitasaun sede suku sira-ne’e, parte ida atu apoiu servisu suku nian iha baze hodi to’o iha nasionál.
“Iha tinan oin, ita sei halo reabilitasaun ba sede suku hotu iha Timor laran tomak ne’e hamutuk 250. Purtantu, ne’e hanesan esforsu ida-ne’ebé mak Governu halo para bele rekoñese suku, enkuantu hanesan asosiasaun komunitáriu para apoiu servisu administrasaun komunidade nian,” Miguel Perreira de Carvalho hateten bainhira hatán ba preokupasaun hosi populasaun Baucau ne’ebé kestiona kona-ba kondisaun sede suku balun aat ona, iha atividade diálogu entre Prezidente Repúblika ho populasaun Baucau, iha resintu Administrasaun Munisípiu Baucau, Baucau Vila Nova, kinta ne’e.
Nia esklarese ba autoridade lokál Baucau katak, iha 2021, sede suku hamutuk 23 mak Governu sei reabilita sede suku 11. Tanba ne’e, nia hateten, iha Munisípiu Baucau Governu sei reabilita sede suku hamutuk 34.
Entretantu preokupasaun seluk ne’ebé autoridade lokál sira hato’o kona-ba atu aumenta orsamentu ba Planu Nasionál Dezenvolvimentu Suku (PNDS) ne’e, nia hatán, Governu rejista hel tanba to’o agora Governu TL halo ona despeza tokon $5 ba Munisípiu Baucau liuhosi programa PNDS.
“Halo projetu PNDS iha Munisípiu Baucau ne’e purvolta 176 projetu. Tanba ne’e, iha tinan oin, PNDS sei implementa iha suku 26 ho totál orsamentu tokon $1.3. Tanba suku sira-ne’ebé iha Postu Administrativu Venilale, Baguia no Vemasse, PNDS sei tama iha imi-nia suku. Maibé, só osan iha rihun $50 de’it ba kada suku. Entaun, ita husu para aumenta uitoan ba rihun $6 ka rihun $150. Hosi prejetu PNDS tama iha suku sira-ne’e, parte ida atu tetu ba sustentabilidade fiskál rai nian inklui kapasidade suku nian hodi jere osan sira-ne’e,” nia hateten.
Jornalista: Osória Marques
Editór: Cancio Ximenes
