DILI, 18 dezembru 2020 (TATOLI)—Governu liuhosi Sekretaria Estadu Peska (SEP) apoia ró peska sanulu inklui ekipamentu peska ba grupu peskadór sira hodi bele ajuda atividade iha tasi laran ho di’ak liután.
“Ohin fahe ró sanulu inklui ekipamentu hanesan rede no cold box,” Sekretáriu Etadu Peska, Elídio de Araujo, informa hafoin seremónia entrega ró ba grupu peska sira iha Sionál, Dili, sesta ne’e.
Enkuantu, rede ne’ebé sei fornese ba grupu peskadór, kada grupu ida hetan rede 12, kail, inklui ekipamentu ne’ebé maka suporta peskadór sira halo atividade.
Governante ne’e esplika, materiál hirak ne’e antes Governu liuhosi Ministériu Agrikultura Peska (MAP) sosa no apoia ba grupu peskadór sira iha munisípiu balun.
“Iha Dili ohin loron ita fahe tan ró ba grupu peskadór sira no Baucau maka sei ikus. Ita sei fahe tan ba grupu peskadór sira iha ne’ebá,” nia akresenta.
Orsamentu sosa ró no ekipamentu peska sira prevee iha orsamentu 2019.
Sekretariu Etadu Elídio husu ba grupu sira ne’ebé simu tenke kuidadu ró ho di’ak no uza ró ba interese grupu nune’e ajuda rendimentu ekonomia grupu no família ida-idak nia.
“Governu sei la haluha peskadór sira no sei kontinua apoiu nafatin hodi buka moris liuhosi peska nian,” nia hatutan.
Diretór Nasionál Peska, Celestino da Cunha Barreto, husu ba grupu peskadór ne’ebé maka simu ró no fasilidade peska tenke kuidadu sasán.
“Imi tenke kuidadu fasilidade hanesan ita bo’ot sira-nia atubele uza sustenta imi-nia familia,” nia fó hanoin.
Iha fatin hanesan, Administradór postu administrativu Don Aleixo, Tomas Barros, husu ba Governu, liuliu SEP atu kontinua apoiu ba grupu peskadór sira ne’ebé seidauk hetan apoiu.
“Ha’u atu husu ba Sekretáriu Estadu no Peska atubele konsidera grupu ne’ebé sira-nia proposta ne’ebé hatama ba iha Sekretáriu Estadu Peska, maibé resposta ba oin haree iha mandatu tomak, ida ne’e atubele responde la 100% maibé responde balun,” nia tenik.
Nune’e mós, portavóz grupu peskadór Sunrise, Salamão Endrique, apresia no kontente tanba proposta ne’ebé nia submete bele hetan rezultadu pozitivu.
“Ami sei kuidadu ró no sei uza ba interese grupu nian,” nia kompromete.
Entertantu grupu peskadór sanulu ne’ebé maka simu ró peska husi SEP kompostu husi grupu peskadór Rai Henek Mutin husi Hera, Grupu Hametin Uma-laran husi suku Metiaut, Grupu Kreatividade Hamutuk husi suku Madohi, grupu peskadór Imanuel husi suku Beleoi Atauro, grupu peskadór Sunrise, grupu buka moris husi suku Bikeli Atauro, grupu peskadór Iloi Ana husi suku Beloi Atauro no grupu peskadór Anin Tasi husi suku Hera no grupu ida husi Atauro.
Partisipa iha sremonia entrega ró maka SEP, Reprezentante Komadante Unidade Polísia Marítima, Administradór postu Dom Aleixo ne’ebé reprezenta Administradór minisípiu Dili no entidade sira seluk.
Ró no ekipamentu peska hetan ona bensaun direita husi Padre José Tasae.
Jornalista: Natalino Costa
Editora: Julia Chatarina
