iklan

HEADLINE, SAÚDE

MS asina kontratu ho pesoál saúde ema na’in 134

MS asina kontratu ho pesoál saúde ema na’in 134

Ministra Saúde, Odete Maria Freitas Belo. Imajen Tatoli /Egas Cristovão

DILI, 29 dezembru 2020 (TATOLI)—Ministra Saúde, Odete Maria Freitas Belo, hamutuk ho Komisaun Funsaun Públika iha tersa ne’e asina termu aseitasaun rekrutamentu públiku ho profisionál saúde, médiku espesialista, médiku jerál, parteira no tékniku aliadus hamutuk ema na’in 134.

”Iha profisionál saúde hamutuk 143 ne’e iha espesialista na’in tolu, iha médiku jerál na’in 12, parteira na’in 18 no tékniku diagnóstiku teropiótiku  saúde publika nian 101,” Governante ne’e informa iha ninia diskursu iha Palasiu Sinzas Caicoli, Dili, (29/12).

Notísia Relevante :OJE 2021 aprova, MS sei hahú rekruta profisionál saúde 320

Pesoál Saúde hirak ne’e sei reforsa polítika ba implementasaun saúde iha família iha tinan 2021hodi hadi’a liután prestasaun kuidadu saúde primária.

“Sira ne’ebé simu  termu aseitasaun  bele liga direitamente ho pasiente  iha kuidadu prestasaun saúde primáriu iha ospitál idaidak nian Munisípiu no iha  idaidak nia área espesializasaun nian,’’ tenik Ministra Saúde.

Iha fatin hanesan Diretora Rekursu Umanu, Ministériu Saúde, Tomasia de Sousa, hateten emposadu hirak ne’e iha tinan 2019 Ministériu Saúde fó sai vaga hodi rekruta pesoál hamutuk ema na’in 320.

”Ohin ha’u dehan katak husi 320 vaga ne’e , 110 sira simu termu aseitasaun iha  fulan-fevereiru tinan-2020,  entaun 210 vaga ne’e mak ita  re-anúnsiu filafali no ohin sira simu  termu aseitasaun ne’e hamutuk 134 signifika katak vaga ne’ebé mak  iha 320 ne’e  priensidu hotu ona,’’ nia hateten.

Tuir planu emposadu hirak ne’e sei koloka ba idaidak ninia munisípiu no postu Administrativu sira iha territóriu Timor-Leste.

Notísia Relevante :MS Sei Rekruta Pesoál Saúde Sira Ne’ebé Termina Ona Estudu

Jornalista :Felicidade Ximenes

Editór:Agapito dos Santos

iklan
iklan

Leave a Reply

iklan
error: Content is protected !!