DILI, 29 dezembru 2020 (TATOLI)--Iha tinan ne’e (2020), Governu liuhosi Ministériu Obra Públiku (MOP) konsege halo reabilitasaun no manutesaun ba estrada rurál hamutuk pakote 66 iha teritórriu Timor-Leste.
Tuir nota imprensa ne’ebé TATOLI asesu, iha tinan ne’e MOP kontinua superviziona obra estrada rurál, ne’ebé selebra ona kontratu iha tinan 2019 hamutuk pakote hamutuk 66 ba estrada ho distánsia kilómetru 55,25, manutensaun periódiku kilómetru 238,60 no manutensaun rutina kilómetru 306,10.
Husi pakote hirak ne’e, pakote 39 ninia progresu fíziku atinje entre 75% to’o 100%, pakote 9 entre 50% to’o 74% no pakote 28 progresu fíziku foin mak atinji entre 28% to’o 49%.
MOP kontinua halo supervizaun no kontrolu kualidade ba trosu estrada nasionál sira hamutuk sesaun 13 ho ninia naruk kilómetru 419, ne’ebé iha trosu rua mak kompleta ona no sei iha trosu 11 ne’ebé progresu atuál 56,5%, signifika katak halo servisu signifikante tebes ho taxa 12% progresu atuál.
Nune’e, MOP mós implementa estudu no dezeña ba trosu estrada munisípiu no urbanu munisípiu Maliana hamutuk trosu 12 ho naruk kilómetru 247,7 ne’ebé daudaun iha progresu dezeñu prelimináriu.
Aleinde ne’e, implementa estudu no dezeñu ba ponte hamutuk 10 ho naruk metru 740, ne’ebé iha ona dezeñu prelimináriu.
Ministériu mós halo levantamentu, dezeñu no Bill of Quantities (BoQ) ba trosu estrada urbanu 5 hanesan iha Baucau kilómetru 23, Ermera kilómetru 20, Lautém kilómetru 10, Dili A kilómetru 26,9 no Dili B kilómetru 26,9 ne’ebé tuir planu sei finaliza iha 2020.
“Kontinua superviziona ba konstrusaun estrada nasionál Dili-Manatuto-Baucau ne’ebé atinje ona porvolta 98%. Kontinua halo konstrusaun ba estrada nasionál Baucau-Viqueque ho distánsia kilómetru 60, husi Laulara-Solerema ho distánsia kilómetru 28,5 ho progressu fíziku porvolta 6%,” refere nota impresa ne’e.
Entretantu, progresu fíziku estrada munisipál Aipelu-Bazartete ho distánsia kilómetru 13,5 atinje ona 96,6% no ba trosu Ermera-Fatubessi ho distánsia kilómetru 11,81 atinje ona 50,7%.
Implementasaun Projetu Emerjénsia hodi responde ba kauza husi inundasaun iha loron 13 marsu 2020, ne’ebé kobre ba kontrolu Cheia hamutuk pakote 10 ho progresu atinje ona 83,93%.
Jornalista: Florêncio Miranda Ximenes
Editora: Julia Chatarina
