DILI, 05 janeiru 2021 (TATOLI)—Xefe Gabinete Kontrolu Kualidade Ospitál Nasionál Guido Valadares (HNGV-sigla portugés), Sara Maria Xavier, relata durante tinan 2020, bebé hamutuk 5.633 maka moris iha sala Maternidade Ospitál Nasionál Guido Valadares (HNGV-sigla portugés), no husi númeru ne’e bebé na’in 94 maka mate.
”Inan sira ne’ebé mak konsulta iha maternidade HNGV durante Tinan-2020 hahú husi janeiru to’o dezembru iha maternidade hamutuk 5.643, husi 5.643 ne’e sira ne’ebé mak partu hamutuk 5.567 husi númeru ne’e sira ne’ebé mak partu normál hamutuk 4.134 no partu sezariana hamutuk 1.093 no sira ne’ebé mak partu liuhusi ventoza 368,’’ nia dehan ba jornalista sira iha HNGV, tersa ne’e.
Notísia Relevante :Jullu, bebé 500-resin moris iha HNGV
Kona-ba bebé na’in 94 ne’ebé mak mate, nia esplika sira mate kedas iha inan-nia kabun laran antes partus. No inan ne’ebé mak mate iha sala maternidade durante tinan 2020 hamutuk na’in 8 ho kazu grave durante partus.
“Kazu grave tanba inan balun partus iha uma depois akontese ran fakar mak transfere mai iha HNGV maibé mate iha dalan entaun ida ne’e akontese iha Dili no sira seluk ne’e maihusi Munisípiu sira tanba inan sira komplikasaun grave tebes,’’Sara dehan.
Sara dehan, inan sira ne’e balun partu komplikasaun hanesan hemorazia pospartu, hipertensaun, partu ho ran fakar barak.
Entretantu, durante loron 25 fulan-dezembru, bebé hamutuk na’in 26 maka moris ho instrumentál na’in rua, partu sezariana na’in 7, partu normál 17. Bebé moris ho kidan mak uluk hamutuk na’in haat, bebé kaduak iha rua.
Bebé ne’ebé mak moris iha loron 1 fulan-janeiru 2021 hamutuk 12, partu normál 11 no partu sezariana na’in.
Nune’e durante fulan dezembru pasiente hamutuk na’in 14 mak mate iha Sala Emerjénsia tanba kauza husi atakasaun fuan no moras pneumonia.
“Agora sira ne’ebé mak mate iha emerjénsia na’in ualu no na’in neen mate iha dalan mak mai entaun sira ne’ebé mak mate iha emerjénsia ne’e kauza atakasaun fuan, pneumonia, kankru iha prankeas no aspirasaun ema sira ne’e ho idade ho avansadu sira,’’ nia hateten.
Pasiente 4.518 maka halo tratamentu saúde iha Sala Emerjénsia HNGV durante fulan-dezembru, pasiente husi kauza asidente tráfegu motor hamutuk 115, karreta 25 maibé la rezulta ema mate.
Aleinde, violénsia fiziku hamutuk 12, ema hana ho rama ambon na’in ida no tuda ho fatuk na’in neen, ema pankada hamutuk na’in haat no tenta hemu veneno nain hitu no sira ne’ebé mak hemu tua lanu todan hamutuk na’in hitu.
Notísia Relevante :Tinan 2019, Bebé Moris Iha HNGV Hamutuk 5.791
Jornalista :Felicidade Ximenes
Editór:Agapito dos Santos
