DILI, 05 janeiru 2021 (TATOLI)—Governu sei kria uluk regra ezekusaun molok ezekuta Orsamentu Jerál Estadu (OJE) 2021 ne’ebé mak aprovadu ona iha Parlamentu Nasionál no hetan ona promulgasaun hosi Prezidente Repúblika iha loron 28 dezembru 2020.
Ministru Finansa, Rui Gomes, hateten nia sei aprezenta proposta dekretu-lei kona-ba regra ezekusaun orsamentu tinan ne’e iha reuniaun ezekutivu tuir mai.
“Reuniaun semanál ho Primeiru-Ministru hodi informa kona-ba preparasaun ezekusaun OJE 2021, buat ne’ebé ami prepara hela mak iha reuniaun Konsellu Ministru atu diskute kona-ba dekretu-lei ba ezekusaun orsamentál 2021,” Ministru Rui Gomes relata hafoin ramata reuniaun ho Primeiru-Ministru, Taur Matan Ruak, iha Palásiu Governu, tersa ne’e.
Notísia Relevante: OJE 2021: Saldo tezouru sufisiente, MF seidauk husu levantamentu
Membru ezekutivu ne’e afirma, deketu ne’e ninia lala’ok mak atu kontrola ezekusaun tanba atu ezekuta orsamentu tenke iha regra no tenke hetan aprovasaun iha Konsellu Ministru.
Enkuantu, orsamentu 2021 ho montante biliaun $1,895, foti hosi reseita fundu minarai biliaun $1,377 no reseita naun petrolíferu millaun $508.
Hosi totál reseita fundu minarai biliaun $1,377, millaun $547 foti bazeia Rendimentu Sustentável Estimadu (RSE) no transferénsia superiór liu RSE millaun $829.
Proposta-lei OJE 2021 kompostu hosi saláriu no vensimentu millaun $239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.
Jornalista: Antónia Gusmão
Editora: Julia Chatarina