DILI, 06 janeiru 2021 (TATOLI)–Liuhosi reuniaun Konsellu Ministru (KM), Governu deside estende kontratu empreza MATO Unipessoal Lda no Esperansa Timor-oan (ETO) atu fornese kombustível ba sentrál elétrika Hera durante fulan-ualu tan.
Ministru Prezidénsia Konsellu Ministru, Fidelis Manuel Leite Magalhães, hateten ezekutivu sira delibera projetu ne’ebé aprezenta hosi Ministru Finansa, Rui Augusto Gomes, kona-ba fornesimentu kombustível, ne’ebé determina hodi hala’o konkursu públiku internasionál no aprovizionamentu tranzitóriu ho períodu másimu fulan-ualu.
“Sei iha fali re-konkursu ba prosesu fornesementu kombustível ba sentrál elétrika Hera no espera iha períodu fulan-ualu nia laran Komisaun Nasionál Aprovizionamentu (CNA, sigla portugés) bele halo hikas prosesu konkursu no aprezenta rezultadu ikus hodi lori fali ba Konsellu Ministru hodi halo apresiasaun,” Ministru Fidelis informa hafoin ramata reuniaun KM iha Palásiu Governu, kuarta ne’e.
Notísia Relevante: Governu Deside Empreza MATO Fornese Kombustível iha Sentrál Elétrika Hera
Daudaun ne’e, empreza rua ne’e mak fornese hela kombustível ba sentrál elétrika Hera no sei kontinua hodi hein finalizasaun prosesu konkursu.
Ezekutivu sira hasai desizaun halo ajusta diretu ba estensaun fornesedór kombustível ne’ebé CNA halo antes ona.
Antes ne’e, KM deside empreza MATO ne’ebé halo konsórsiu ho NIMAT Mujur SDN hosi Malázia fornese kombustível ba sentrál elétrika Hera iha lote 1, hamutuk ho empreza ETO.
Jornalista: Antónia Gusmão
Editora: Julia Chatarina
