DILI, 06 janeiru 2021 (TATOLI)–Governu liuhosi Ministériu Koordenadór Asuntu Ekonómiku (MKAE) planeia ona atu inklui máskara ba komunidade liuhosi programa Cesta Bázika, tanba konsidera importante ba prevensaun surtu COVID-19.
“Item lubuk ida mak tama hotu ona iha Cesta Bázika, maibé máskara de’it mak seidauk tama. Produtu ijiene ne’e ninia objetivu atu fornese ba populasaun hodi proteje sira nia-an hosi vírus. Kona-ba máskara se iha ezijénsia boot ba ida-ne’e no ami sei haree,” Ministru Joaquim hateten iha Palásiu Governu, kuarta ne’e.
Iha fatin hanesan, Ministru Prezidénsia Konsellu Ministru, Fidelis Manuel Leite Magalhães, fiar katak populasaun barak asesu ona ba máskara, maibé bainhira laiha bele sosa ho folin ne’ebé baratu.
“Antes ne’e hotu-hotu pániku, entaun folin karun no sai hosi kontrolu. Maibé, agora ne’e normaliza tiha ona presu máskara,” governante ne’e dehan.
Maski nune’e, membru ezekutivu ne’e afirma, Governu la taka matan no posibilidade sei foti no asegura katak ba saúde públiku, populasaun sempre iha asesu ba saida mak sira presiza.
Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu husi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina nú, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.
Enkuantu ba produtu ijiene maka, sabaun, álkool jel, deterjente, eskova nehan no pasta nehan.
Jornalista: Antónia Gusmão
Editora: Julia Chatarina
