DILI, 06 janeiru 2021 (TATOLI)-–Governu liuhosi Ministériu Koordenadór Asuntu Ekonómiku (MKAE) husu ba kompañia atu kumpre obrigasaun kontratu fornese ai-han kualidade iha implementasaun programa Cesta Bázika.
“Ha’u husu ba kompañia no fornesedór sira atu nafatin asegura fornese ai-han kualidade no kuantidade, liuliu nutrisaun ba ai-han sira ne’e atu benefisiáriu sira bele simu no konsumu ho saudável,” Ministru Koordenadór Asuntu Ekonómiku, Joaquim Amaral, hateten iha Pálasiu Governu, kuarta ne’e.
Governante ne’e hato’o kestaun ne’e hodi responde preokupasaun benefisiáriu sira iha territóriu laran ne’ebé simu ai-han balun fuhuk no dodok.
“Ami mós husu ba komunidade sira atu ajuda hato’o informasaun ba Governu hodi bele hadi’a ai-han balun ne’ebé laiha kualidade no ami husu kontinua kumpre prevensaun COVID-19,” Ministru fó hanoin.
Tuir nia, programa Governu iha ámbitu rekuperasaun ekonómika ne’e sei iha fulan-rua tan atu termina no nia fiar katak sidadaun hotu sei asesu programa ne’e, tanba ne’e ministériu implementadór sira kontinua hadi’a implementasaun.
“Implementasaun Cesta Bázika iha tinan 2020, hahú hosi novembru to’o dezembru, maibé ita iha tan fulan-rua atu termina implementasaun, importante mak sidadaun hotu asesu,” nia akresenta.
Iha biban hanesan, Ministru Turizmu, Komérsiu no Indústria, José Lucas do Carmo da Silva, garante ai-han ne’ebé kompañia fornese barak maka saudável no kualidade, maski balun fuhuk no dodok duni.
“Ami kontinua halo avaliasaun hodi husu kompañia sira atubele mellora liuliu garante kualidade no kuatidade inklui garante ai-han saudável,” nia dehan.
Kona-ba família balun ne’ebé ninia membru sira la asesu, governante ne’e rekoñese iha terrenu situasaun ne’e mosu, maibé Governu implementa programa ne’e ho baze ba lista hosi Ministériu Administrasaun Estatál (MAE) ho totál populasaun millaun 1,5 maka sei asesu.
“Ita fahe Cesta Bázika tuir lista membru família, maibé ida-ne’ebé la hetan bele konfirma fali iha Xefe Suku sira atubele asesu ka bele hatama ba lista reklamasaun tanba laiha ema ida mak la simu. Dekretu-lei ba implementasaun programa ne’e sei la halo diskriminasaun ba sidadaun ida,” Ministru subliña.
Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu hosi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina nú, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.
Enkuantu ba produtu ijiene maka, sabaun, álkool jel, deterjente, eskova nehan no pasta nehan.
Benefisiáriu ba Cesta Bázika maka membru idaidak agregadu familiár sei hetan $25, kada fulan iha fulan-rua nia laran no bele troka ho folin sasán ne’ebé korresponde ba valór osan.
Jornalista: Florêncio Miranda Ximenes
Editora: Julia Chatarina
