DILI, 07 janeiru 2021 (TATOLI)--Primeiru Ministru (PM), Taur Matan Ruak, hateten iha tinan ne’e seidauk iha hanoin atu halo remodelasaun ba membru VIII Governu Konstitusionál tanba la nesesáriu.
“Ha’u seidauk iha hanoin atu halo remodelasaun tanba ami remodela hela bebeik ne’e tanba Vise Primeiru-Ministru sira ne’e foin mai, maibé kuandu nesesáriu bele halo remodelasaun, maibé pur enkuantu agora seidauk,” Xefe Governu informa hafoin enkontru ho Prezidente Repúblika, Francisco Guterres ‘Lú Olo’, iha Palásiu Prezidensiál, Bairro Pité, kinta ne’e.
Maski nune’e, Xefe Ezekutivu dehan, remodelasaun boot ne’ebé halo mak atu reforsa ekipa Vise Primeiru-Ministru no Ministru Planu no Ordenamentu, ne’ebé kuaze prenxe governasaun tomak hodi reforsa serbisu.
“Kuandu iha (remodelasaun) ne’e ami sei informa no desizaun ne’e bele avansa, ha’u hanesan Primeiru-Ministru dehan laiha remodelasaun,” Eis Prezidente Repúblika ne’e akresenta.
Iha juñu 2020, Prezidente Repúblika fó pose ba membru Governu Konstitusionál na’in-21, liuhosi Dekretu Prezidente Repúblika, númeru 53/2020 no uza kompeténsia konstitusionál tuir artigu 106 númeru 2.
Pose ne’e hafoin nomea Vise Primeiru-Ministru no Ministru Planu no Ordenamentu José Maria dos Reis, Ministru Koordenadór Asuntu Ekonómiku Joaquim Amaral, Ministru Negósiu Estranjeiru no Kooperasaun Adaljiza Albertina Xavier Reis Magno, Ministru Edukasaun, Juventude no Desportu Armindo Maia, Ministru Turizmu, Komérsiu no Indústria, José Lucas do Carmo da Silva, Ministru Interior Taur Matan Ruak, Ministru Petróleu no Minerál , Víctor da Conceição Soares.
Nune’e mós, Xefe Estadu fó pose ba Vise-Ministru Negósiu Estranjeiru no Kooperasaun Julião da Silva, Vise-Ministru Justisa José Edmundo Caetano, Vise-Ministru Administrasaun Estatál Lino de Jesus Torrezão, Vise-Ministru Saúde Bonifacio Mau Coli dos Reis, Vise-Ministru Edukasaun, Juventude no Desportu António Guterres, Vise-Ministru Turizmu, Komérsiu no Indústria, Domingos Lopes Antunes, Vise-Ministru Turizmu Komunitária no Kulturál, Inâcia da Conceição Teixeira, Vise-Ministru Agrikultura no Peska Abilio Xavier de Araújo, Vise-Ministru Interiór, António Armindo.
Alinde ne’e, Xefe Estadu mós fó pose ba Sekretáriu Estadu Formasaun Profisionál no Empregu Alarico de Rosário, Sekretáriu Estadu Kooperativa Elizário Ferreira, Sekretáriu Estadu Peska Elídio de Araújo, Sekretáriu Estadu Juventude no Desportu Abrão Saldanha, Sekretáriu Estadu Protesaun Sivil, Joaquim José Gusmão dos Reis Martins.
Iha pose dahuluk fó ba membru Governu na’in-ualu no daruak fó ba membru Governu na’in-21, nune’e totál membru VIII Governu Konstitussionál hamutuk na’in-43.
Jornalista: Florêncio Miranda Ximenes
Editora: Julia Chatarina