DILI, 11 janeiru 2021 (TATOLI)—Governu sei halo nomeasaun uluk ba Koordenadór Unidade Jestaun Projetu (PMU, sigla ingles) hafoin bele implementa projetu kabu submarinu, ne’ebé tuir planu sei implementa iha tinan ne’e.
“Kabu submarinu fó ona espasu oituan ba oin, ko’alia ona kona-ba modelu kontratu, Koordenadór PMU maka sei asegura projetu ne’e ba oin no halo prosesu aprovizionamentu atu dudu prosesu ne’e la’o lalais,” Vise Primeiru-Ministru no Ministru Planu no Ordenamentu, José Maria dos Reis, informa hafoin ramata reuniaun semanál ho Primeiru-Ministru, Taur Matan Ruak, iha Palásiu Governu, segunda ne’e.
Notísia Relevante: Tinan oin, Governu ezekuta ona projetu kabu submarinu
Governante ne’e klarifika, razaun nomea responsável ida atubele akompaña tékniku sira iha terrenu.
Serbisu ne’e sei envolve ministériu seluk aleinde Ministériu Planu no Ordenamentu (MPO), envolve mós Ministériu Transporte no Komunikasaun (MTK) no Ministériu Finansa (MF) atu diskute kona-ba nomeasaun Koordenadór PMU.
Antes ne’e, ezekutivu sira deside prevee orsamentu liuhosi desizaun Konsellu Administrasaun Fundu Infraestrutura (KAFI) no Konsellu Ministru delibera no aprova projetu ligasaun kabu submarinu liga husi Austrália mai Timor- Leste.
Ba projetu ne’e, Governu prevee ona millaun $41,588 iha verba Fundu Infraestrutura (FI), iha orsamentu tinan fiskál 2021, hodi halo akizisaun ekipamentu informátika kabu submarinu.
“Kona-ba prosesu sosa ekipamentu informátika, depende tanba sei liuhosi prosesu konkursu, tanba ita hotu hatene katak projetu ne’e nu’udar projetu foun,” nia akresenta.
Daudaun ne’e parte aprovizionamentu halo ona prosesu kontratuál no konkursu, nune’e iha tempu badak loke konkursu ba públiku.
Entretantu, polítika dada kabu submarinu husi Darwin mai Timor-Leste nu’udar prioridade Governu ho kooperasaun Governu Canberra, ho objetivu atu eleva kapasidade rede internet iha rai laran, tanba VIII Governu Konstitusionál mós iha programa ne’ebé bainhira atu realiza presiza iha liña internet ho lais.
Jornalista: Antónia Gusmão
Editora: Julia Chatarina
