DILI, 11 janeiru 2021 (TATOLI)—Diretór Nasionál Empregu Esteriór, hosi Sekretaria Estadu Formasaun Profisionál no Empregu (SEFOPE), Filomeno Soares, hateten Polísia Investigasaun Austrália manda ona karta ba SEFOPE hodi husu autorizasaun família halo autopsia ba mate-isin traballadór Seasonal Worker Programme (SWP) timor-oan ne’ebé mate tanba asidente tráfegu.
Traballadór timor-oan naran Tomas Pereira ho idade 25 hosi munisípiu Bobonaro (hela iha Dili), hakotu iis tanba asidente ho karreta, iha domingu dader iha Tasmánia, Austrália.
“Enkontru partikulár ohin iha hanoin rua de’it, dahuluk maka Governu liuhosi SEFOPE koordena ho Embaixadora Timor-Leste iha Austrália no Adidu iha Darwin atu organiza no kontaktu hodi halo akompañamentu prosesu investigasaun ba kazu ne’e, nune’e bele relata mai iha ne’e. Daruak, hosi Polísia Investigasaun Austrália hakarak husu atu família hakerek karta eskrita ida hodi fó autorizasaun atubele halo autopsia ka lae,” Diretór ne’e informa ba Agência TATOLI via telefónika, segunda ne’e.
Notísia Relevante: Traballadór timor-oan ida hakotu iis iha Austrália tanba asidente karreta
Tuir Dirijente ne’e, bainhira família la konkorda ka Lakohi halo halo autopsia ba mate-isin, presiza mós hakerek karta, nune’e responsável sira iha Austrália bele iha koñesimentu no sira sei respeita nafatin desizaun.
“Ami husu ona família no sira aseita atu halo autopsia, maibé la’ós atu ko’a mate-isin, maibé família autoriza de’it foti teste seluk hodi identifika karik iha buat ruma,’ nia akresenta.
Aleinde ne’e, SEFOPE akompaña família halo karta no manda ba Embaixada Timor-Leste iha Austrália no Polísia Investigasaun.
“Kauza ne’e tanba asidente maibé investigasaun mak foin hatene di’ak, tanba tuir istória nia lori karreta mesak no laiha ema ida iha karreta laran,” nia hatutan.
Kona-ba mate-isin atu haloot iha ne’ebé, Diretór Filomeno Soares, Diretór Jerál inklui Sekretáriu Estadu rasik ko’alia ona tanba traballadór ba serbisu legál tuir programa Governu, maka Governu sei fasilita.
“Ida-ne’e ami-nia responsablidade, Diretór sira no Sekretáriu Estadu Formasaun Profisionál Empregu, Alarico do Rosário. Tanba ne’e, Governu esforsu no prontu, ne’ebé presiza trata prosesu administrasaun atubele lori filafali mate-isin mai Timór hodi entrega ba família,” Diretór Filomeno Soares subliña.
Jornalista: Natalino Costa
Editora: Julia Chatarina
