CAC halibur informasaun fiskaliza atividade jogu slot machine
DILI, 13 janeiru 2021 (TATOLI)-Komisaun Anti-Korrupsaun (CAC) sei halibur informasaun relevánsia sira hosi operadór modalidade jogu slot machine hodi bele halo fiskalizasaun ba kontratu sira ne’ebé regula tuir Dekretu-Governu no Diploma Ministeriál, Ministériu Turizmu Komérsiu no Indústria (MTKI) Nú.3/2019,06 fevereiru.
Notísia Relevante : Empreza slot machine balun “la tau osan” garantia iha banku
Adjuntu Komisáriu CAC ba Asuntu Prevensaun no Sensibilizasaun, Luis Oliveira Sampaio, hateten, frankamente CAC seidauk halo koordenasaun, kontrolu no fiskalizasaun ba atividade jogu ho modalidade slot machine, lotaria no jogu tradisionál ne’ebé legaliza tuir Diploma Ministerial MTKI, maibé iha Lei foun Medida Prevensaun no Kombate Korrupsaun (MPKK) ezije mós papél CAC oinsá atu fiskaliza no halo koordenasaun ho instituisaun relevante ba jogu sira identifikadu rejistu tanba kontribuisaun taxa ba Estadu ka ba fin rekursu Estadu nian oinsá bele asegura ho di’ak.
“Normálmente kuandu hetan informasaun sei halo koordenasaun Diresaun Prevensaun halibur informasaun relevante ruma sei kanaliza ba parte investigasaun hodi analiza aprofunda loke prosesu,” Luis Oliveira Sampaio hateten hodi responde ba Agência Tatoli, ohin, iha nia servisu fatin CAC, Dili.
Kona-ba fiskalizasaun CAC nian ba jogu slot machine balun ne’ebé la kumpre rekizitu sira, hanesan la tuir konkursu públiku no la iha osan tau iha konta bankária ho montante $10,000,000.00, Adjuntu Komisáriu CAC ne’e hateten, CAC iha rekursu limitadu tebes la konsege identifika indísiu poténsia risku irregularidade, maibé informasaun sira ne’ebé fó sai iha Agência TATOLI no mídia seluk bele ajuda CAC hanesan sai baze informasaun atu CAC asume nia papél investigasaun.
Luis Oliveira, hateten instituisaun tutela ne’ebé halo kontrolu ba atividade jogu sira hanesan slot machine, lotaria no jogu tradisionál kabe ba responsabilidade MTKI, maibé ba oin CAC sei konsolida ba servisu autoridade sira reforsa koordenasaun servisu ne’ebé loloos tenke halo kna’ar hodi halo kontrolu ajuda Estadu bele minimiza poténsia risku prátika irregularidade.
Hatán kona-ba iha operadór slot machine balun la kumpre lei no hetan adjudikasaun direita hosi Governu hodi halo ona operasaun, Luis Oliveira Sampaio, hateten, poténsia sira ne’e presiza atua.
“Sempre halo iha ligasaun ho rekursu Estadu nian sira ne’ebé hala’o sira-nia kna’ar tuir lei karik iha poténsia atu dezvia rekursu ne’ebé tuir loloos tenke tama ba Estadu sira la halo tenke atua,” Luis Oliveira afirma.
Daudaun ne’e, Luis Sampaio hateten tan CAC seidauk halo fiskalizasaun ba atividade jogu sira ne’e, maibé kuandu iha kazu ho informasaun ne’ebé iha indísiu forte prosesu sempre lao, katak servisu sira ne’ebé iha CAC iha parte rua ida inisiativa mai hosi CAC rasik no ida seluk mak delegasaun hosi Ministériu Públiku hodi halo investigasaun ba kazu sira ne’ebé iha.
Jornalista : Nelson de Sousa
Editór : Francisco Simões
