DILI, 13 janeiru 2021 (TATOLI)—Iha reuniaun Konsellu Ministru (KM) aprova ona ho alterasaun, projetu planu lejislativu Governu ba tinan 2021, ne’ebé aprezenta hosi Ministru Prezidénsia Konsellu Ministrus, Fidelis Manuel Leite Magalhães.
Ministru Fidelis, hateten planu lejizlativu ne’e ba lei no dekretu-lei sira hotu ne’ebé mak Governu hakarak halo iha tinan 2021 nia laran.
“Konsellu Ministru aprova no membru Governu hotu konkorda, maibé balun husu atubele aumenta tan inisiativa lejizlativa balun, ne’ebé sei fó tempu loron hirak nia laran atu kompleta, nune’e bele taka ona lista ne’ebé mak sai prioridade ba Governu no sei hatuur inisiativa lejizlativa tomak durante 2021,” Porta vós Governu ne’e relata hafoin ramata reuniaun ezekutivu, iha Palásiu Governu, kuarta ne’e.
Planu lejislativu ne’e elabora bazeia ba proposta ne’ebé submete hosi membru Governu ba Konsellu Ministru no halo previzaun ida hosi intervensaun lejislativa Governu no prioridade, fahe ba setór sira iha tinan 2021.
Planeamentu lejislativu mak hanesan instrumentu konsagradu atu hadi’a kualidade atividade intervensaun lejislativa Governu.
Jornalista: Antónia Gusmão
Editora: Julia Chatarina
