DILI, 15 janeiru 2021 (TATOLI)—Governu Timor-Leste liuhosi Ministru Prezidensia Konsellu Ministru hamutuk ho Compact Development Team Timor-Leste (CDT-TL), hahú esforsu konklui no asina akordu ho Estadu Unidu Amérika (EUA).
Liuhosi akordu ne’e, Timor-Leste sei hetan fundu ho valór millaun $285 hosi EUA, hodi hala’o atividade Millennium Challenge Corporation (MCC), implementa projetu rua iha área dahuluk bee, saneamentu, drenajen no seluk iha edukasaun.
Tuir Diretór Ezekutivu Nasionál CDT-TL, Constâncio da Conceição Pinto, Timor-Leste sei selu ho rezultadu liuliu retornu ekonómiku, katak iha tinan 15 mai hafoin investimentu MCC tenke iha rezultadu di’ak iha área rua ne’e iha kapitál Dili, hanesan inundasaun menus, labarik diarea no dengue menus inklui ekonomia aumenta.
“Programa investimentu kompaktu ne’e hanesan komitmentu Amérika atu apoiu Timor-Leste nia dezenvolvimentu. Ita selu investimentu ho retornu ekonómiku, la’ós haruka ita selu fali ho osan ba Estadu Unidu Amérika tanba osan fó ho gratuita,” Diretór Ezekutivu dehan, iha sesta ne’e, iha Palásiu Governu.
Notísia Relevante: EUA sei apoiu millaun $285 finansia projetu rua iha Timór
Constâncio Pinto dehan, projetu água no sanemanetu inklui drenajen sei implementa iha Dili inklui kria fábrika tratamentu bee ba munisípiu Ermera no Maliana, enkuantu iha área edukasaun foku liu ba formasaun profesor ba ensinu sekundária.
Tanba ne’e, ekipa ne’ebé envolve halo esforsu atu bele konklui serbisu no estudu hodi bele selebra asina iha tempu badak.
“Importante tebes mak ita kria ona time line atubele serbisu di’ak liután hodi alkansa objetivu ida-ne’e, maibé Governu Timor-Leste ho CDT-TL sei halo esforsu tomak hodi kompaktu ne’e bele asina iha fulan juñu tinan ne’e, maibe depende mós ba situasaun COVID-19,” nia akresenta.
Montante orsamentu ne’ebé EUA fó depende ba estudu viabilidade ne’ebé mak la’o ona iha projetu rua ne’e, tanba liuhosi estudu bele rekomenda montante a’as ou menus liu montante ne’ebé mak prevee ona.
“Se karik iha fulan juñu mak Governu Timor-Leste no CDT-TL konsege asina ona kompaktu ne’e ho Estadu Unidu Amérika mak implementasaun sei hahú iha tinan ne’e to’o tinan lima ba oin tanba projetu ne’e tenke implementa hotu,”nia hatutan.
Bainhira Governu Timor-Leste la konsege ezekuta orsamentu implementa projetu ne’e to’o hotu, maka osan ne’e sei haruka fali ba EUA.
“Nune’e presiza planu di’ak atu ezekuta ho didi’ak to’o hotu,” Diretór CDT-TL fó hanoin.
Jornalista: Florêncio Miranda Ximenes
Editora: Julia Chatarina
