DILI, 18 janeiru 2021 (TAOTLI)–Diretór Jerál hosi Sekretaria Estadu Formasaun Profisionál no Empregu (SEFOPE), Paulo Alves, hateten Polísia Investigasaun Austrália hahú halo investigasaun ba asidente tráfegu ne’ebé hamate traballadór timor-oan iha Tasmánia, Austrália.
Investigasaun ne’e hafoin família matebian halo karta deklarasaun hodi autoriza autoridade halo autopsia ba mate-isin traballadór Seasonál Worker Programme (SWP), Tomas Perreira ho idade 25, ne’ebé hakotu iis tanba asidente ho karreta, iha loron domingu (10/01) dadeer.
“Ita halo hela komunikasaun ho Embaixadora Timor-Leste iha Austrália no adidu iha Darwin atu akompaña prosesu investigasaun tanba hafoin deklarasaun hosi familia nian, ita autoriza ona halo investigasaun, ne’ebé seidauk detemina loron atu lori fila mate-isin,” Diretór Jerál, informa iha Caicoli, segunda ne’e.
Notísia relevante: Polísia Austrália husu autorizasaun halo autopsia ba mate-isin traballadór timor-oan
Informasaun ne’e hato’o ona ba família, nune’e bele hein prosesu investigasaun hafoin prosesa fali transladasaun mate-isin mai Timor-Leste.
Governu Timor-Leste liuhosi SEFOPE espera katak prosesu investigasaun bele finaliza lalais.
Enkuantu, Sekretaria Estadu mós kontaktu ona ho jestór toos na’in iha Tasmánia atu sira pro-ativu ba estasaun Polísia hodi koopera ho prosesu investigasaun.
“Ita espera katak prosesu investigasaun ne’e bele finaliza lalais hodi lori mate-isin mai Timor-Leste, atubele entrega ba família hodi halo prosesu funebre,” nia espera.
Tomas Pereira hosi Munisípiu Bobonaro (hela iha Dili), serbisu hahú tinan 2019 iha kompañia Tasmanian Berries.
Jornalista: Florêncio Miranda Ximenes
Editora: Julia Chatarina
