DILI, 19 janeiru 2021 (TATOLI)— Ministériu Edukasaun Joventude no Desportu (MEJD) liuhosi Diresaun Nasionál Infraestrutura Edukativa (DNIE), prevee ona orsamentu espesiál hosi fundu infraestrutura hamutuk millaun $4, atu konstrui edifísiu eskola CAFE haat iha munisípiu haat.
“Ita aloka ona orsamentu hosi fundu espesiál infraestrutura hamutuk millaun $4 atu halo konstrusaun foun ba edifísiu eskola CAFE haat iha munisípiu Lautém, Covalima, Ainaro, no Liquisa,” Diretór Diresaun Nasionál Infraestrutura Edukativa, Hélio Lopez hateten ba jornalista Agência Tatoli iha Vila Verde, tersa ne’e.
Hélio Lopez esplika, eskola CAFE haat ne’ebé MEJD sei konstrui edifísiu foun iha tinan ne’e, ninia prosesu aprendizajen ezisti ona iha tinan 2012.
Hosi orsamentu ne’ebé MEJD prevee, diretór ne’e dehan, sei halo mós reabilitasaun ba eskola CAFE ida iha Munisípiu Baucau ne’ebé anin boot estraga iha tinan kotuk.
Parte DNIE mós submete ona Bill Of Quantity (BOQ) no dezeña konstrusaun, inklui reabilitasaun ba Ministériu Obra Públika ho Ajénsia Dezenvolvimentu Nasionál (ADN) atu halo verifikasaun.
Jornalista: Tomé Amado
Editór: Cipriano Colo
