LAUTÉM, 19 janeiru 2021 (TATOLI)—Iha tinan 2020, Sekretaria Estadu Kooperativa (SEKoop) konsege harii kooperativu produsaun hamutuk 62 inklui hamoris kréditu uniaun 22.
“Iha fulan-juñu to’o dezembru 2020 moris kooperativa produsaun hamutuk 62, ne’ebé maka daudaun SEKoop halo hela planu atu akompaña, monitoriza no superviziona sira, liuliu halo bebeik edukasaun no formasaun ba sira atubele jere no harii kooperativa institusaun ne’ebé maka sira rasik maka na’in ba kooperativa ne’e,” Sekretáriu Estadu Kooperativa, Elizário Ferreira, informa ba Agência TATOLI iha Lospalos villa, munisípiu Lautém, tersa ne’e.
Notísia relevante: Tinan oin, SEKoop foti edukasaun sai prioridade ba grupu kooperativa
Aleinde ne’e, SEKoop mós konsege hamoris kooperativa kréditu uniaun balun.
“Iha 2020, ami harii kooperativa 22, ne’ebé iha fulan-jullu ha’u deklara lima maibé to’o dezembru hamutuk 22, no agora sei iha tan,” nia akresenta.
Entre postu administrativu 67 iha territóriu, 33 maka seidauk iha kooperativa, enkuantu postu administrativu 34 iha ona.
“Ein prinsípiu menus, Oé-cusse iha kooperativa iha villa laran deit, enkuantu iha Oesilo no Netibe seidauk iha. Kooperativa ida iha Oé-cusse naran kréditu uniaun Enklave Oé-cusse maka dezenvolvidu,” governante ne’e hatutan.
Kooperativa ne’ebé SEKoop konsege hamoris iha juñu to’o dezembru iha Covalima no Same tanba haree katak kooperativa iha munisípiu rua ne’e menus, enkuantu iha Ainaro antes ne’e iha kooperativa ida de’it maibé agora iha kooperativa tolu.
“Ami promove kréditu uniaun iha nível postu tanba kooperativa ne’e akomoda kapitál hosi membru sira, hafoin distribui filafali ba membru sira liuhosi empréstimu atu hala’o atividade ekonómiku produtivu hanesan ortikultura hanesan natar no seluk tan. Ita ko’alia kona-ba modo ne’e kuandu kuda sei buras iha ita-nia rai,” nia hatutan.
Daudaun SEKoop hahú atu hadi’a kooperativa ne’ebé eziste, fatin ne’ebé seidauk iha sei harii, nune’e postu administrativu ida bele iha kooperativa.
“Postu administrativu ida la presiza iha kooperativa barak, tanba kooperativa akumula kapitál, futuru kooperativa ne’e asosiasaun, la’ós ema nian, tanba ita osan laiha maka ita halibur malu atu tau osan hamutuk, se ita fahe malu nafatin mak ita kiik nafatin, di’ak liu hamutuk atu halo kapitál ne’e boot no halo membru mós iha barak,” nia tenik.
Jornalista: Natalino Costa
Editora: Julia Chatarina
