DILI, 20 janeiru 2021 (TATOLI)—Sidadaun ida hosi Indonézia ne’ebé hala’o serbisu diplomasia iha Timor-Leste (TL), pozitivu COVID-19 no ekipa hosi Ministériu Saúde (MS) transporta ona ba iha sala izolamentu Vera Cruz, Dili.
“Sidadaun mane ida hosi Indonézia ho idade 30, laiha síntoma viájen hosi Medan-Jakarta iha loron 4 janeiru 2021. Loron 5 janeiru viajen hosi Jakarta-Kupan no hosi Kupan mai Atambua iha loron 6 janeiru, toba iha ótel Matahari iha Atambua villa,” Koordenadór pilár hitu COVID-19 Ministériu Saúde, Nilton da Silva, hateten liuhosi konferénsia imprensa iha salaun MS, Caicoli, kuarta ne’e.
Notísia Relevante:MS re-integra pasiente COVID-19 na’in rua ba família
Nia esplika, pasiente ne’e hosi Atambua mai Dili no halo auto-kuarentena iha otél Beach Garden hamutuk ho nia kolega na’in rua.
Durante auto-kuarentena, ekipa vizilánsia foti amostra swab iha loron 18 janeiru ho rezultadu pozitivu no relata iha loron 20 janeiru.
“Pasiente ne’e diplomata ida, ne’ebé serbisu iha embaixada Indonézia nian,” Nilton da Silva subliña.
Entretantu, dadus loron 20 janeiru 2021 totál komulativu teste 18.111, hein rezultadu 280, komulativu kazu 53, rekuperadu 47 aumenta haat hamutuk 51, kazu foun ida no atuál baixa na’in neen.
Rezultadu negativu 17.778, totál kuarentena 223, Dili 137, Munisípiu 86, auto-kuarentena 101, Dili 97, Munisípiu haat, pasa ona loron 14, 7.331, Dili 6.070, Munisípiu 1.261.
Notísia Relevante:MS sei halo screening masál iha 25 janeiru
Jornalista: Felicidade Ximenes
Editór: Cipriano Colo
