DILI, 20 janeiru 2021 (TATOLI)–Ekipa Konjunta Servisu Investigasaun Kriminál Nasionál (SIKN), Polísia Militár (PM), Servisu Nasionál Intelijénsia (SNI) no Alfándega liuhusi Departamentu Antí-Fraude sei sobu Illas Nossa Senhora de Assunção ne’ebé deskonfia rai materiál ai-moruk droga iha laran.
Estátua ne’e rasik ekipa konjunta halo koordenasaun ho Pároku Igreja São Paulo Lospalos, Thomas Gusmão de Carvalho hodi lori ona mai Dili, iha tersa (19/01).
Ekipa konjunta mós kontinua lori estátua ne’e bá Aeroportu Internasionál Nicolau Lobato, Comoro, Dili, hodi halo teste iha mákina X-Ray.
Tuir dokumentu ne’ebé Agência Tatoli rekolla hosi Madre ADM Ailok-Laran Dili, haktuir katak estátua ne’e Madre Konventu Kasih Mulia ADM Lospalos hamutuk ho Pároku Parókia Lospalos hameno no sosa hosi Jogyakarta-Indonézia mai Timor-Leste liu fronteira terreste to’o iha Postu Integradu Batugadé iha 2 dezembru 2020, no lori bá Lospalos iha 5 dezembru 2020.
Illas Nosa Senhora de Assunção ne’e lori ba Igreja Parókia Lospalos, tuir planu, atu hatúr iha Igreja Muapitine-Lautém.
Daudaun ne’e, ekipa konjunta sei hein Pároku Parókia Lospalos inklui madre sira sei bá hamutuk iha edifísiu SIKN hodi asiste direta prosesu sobu ka loke estátua hodi bele halo identifikasaun no justifika objetu ne’ebé deskonfia.
Ekipa konjunta mós agradese ba kooperasaun hosi Padre no Madre sira hodi fó autorizasaun ba autoridade seguransa halo investigasaun no foti deklarasaun hosi Padre Thomas no Reprezentante Madre Konventu Kasih Mulia ADM, Maria Bolu hodi aprezenta mós deklarasaun ne’ebé antes sira hato’o ba Autoridade Aduaneira ka Alfándega Timor-Leste.
Jornalista: Eugénio Pereira
Editór: Xisto Freitas
