DILI, 22 janeiru 2021 (TATOLI)-–Governu liuhosi Sekretaria Estadu no Ambiente (SEA) renova ona lisensa ambientál empreza Pelican Paradise Group, Lda, ne’ebé tuir planu atu halo dezenvolvimentu turíztiku iha rai ektare 558 ho investimentu millaun $700 iha zona entre Tasi Tolu no Tibar.
“Ami aprezenta ba Sekretaria Estadu Ambiente hodi rona planu ezekusaun projetu sira ne’e no husu duni renovasaun ba lisensa ambientál ne’ebé konsege renova ona,” Diretór Ezekutivu Pelican Paradise, Jeremiah Chan, informa iha ninia knaar fatin, Timor Plaza, sesta ne’e.
Notísia relevante: Governu Apoiu Projetu Pelican Paradise Faze Dahuluk
SEA emite dahuluk sertifikadu lisensa ambientál ba empreza Pelican Paradise iha loron 09 novembru 2018 no ramata iha novembru 2020.
Antes ne’e, ekipa komisaun avaliasaun impaktu ambientál avalia ona dokumentu hafoin emite lisensa ambientál.
“Hafoin lisensa ramata, Sekretaria Estadu no Ambiente halo renovasaun ba tinan rua hahú 21 dezembru 2020 to’o 21 dezembru 2022, ho kategoria A,” Jeremiah Chan haktuir.
Governu liuhosi SEA husu ba empreza sira tenke kumpre dokumentu importante hanaran planu jestaun ambiente, ne’ebé akumula planu hotu inklui metigasaun no asegura ambientál.
Tuir planu, empreza Malázia ne’e sei harii unidade otelaria, kampu golf, lote rezidensiál, sentru dezenvolvimentu ba joven sira, eskola internasionál ida, ospitál ida no sentru komersiál
Jornalista: Florêncio Miranda Ximenes
Editora: Julia Chatarina
