DILI, 23 janeiru 2021 (TATOLI)— Minsitériu Saúde (MS) detekta tan hodi anunsia sidadaun na’in 11 ho pozitivu COVID-19, ne’ebé oras ne’e izola ona iha sala izolamentu Vera Cruz.
Ohin, Minsitériu Saúde mós, re-integra hikas pasiente COVID-19 na’in-tolu ba família, ne’ebé rekopera ona.
Notísia Relevante:Governu autoriza pasajeiru 118 tama hosi fronteira Batugade
Koordenadora Jerál Komisaun Nasionál COVID-19, Ministériu Saúde, Odete da Silva Viegas, anunsia katak, kazu foun COVID-19 hamutuk na’in-11, kompostu hosi feto na’in-hitu no mane na’in-haat ne’ebé hotu-hotu asintomátiku.
“Hosi ema na’in-11 ne’e, ema estranjeiru na’in rua no timor-oan na’in sia. Sira ne’e idade boot liu mak 64 no kiik liu mak 22,’’ Odete hateten liuhosi konferénsia imprensa, iha salaun Ministériu Saúde, Caicoli, sábadu ne’e.
Koordenadora ne’e informa mós katak, pasiente hirak ne’e viajen hosi nasaun Indonézia mai hosi provínsia ne’ebé mak la hanesan, hahú kedan hosi Jakarta, Bandung, Maluku, Solo, Bali no Kupang.
“Sidadaun sira ne’e iha Atambua barak mak semana tolu, semana rua, no balun loron rua. Sira tama mai Timor-Leste iha 20 janeiru ho totál pasajeiru ne’ebé tama hamutuk 118. Hosi 118 ne’e sira mai iha Dili kumpre kuarentena iha otél ne’ebé Ministériu Saúde prepara no iha na’in sia mak auto-kuarentena,’’ nia esplika.
Fatin ne’ebé Ministériu Saúde prepara ba kuarentena obrigatóriu mak hanesan otél Novo Horizonte, YQ hotel, Clara mension, Leokase, Time Square, inklui fatin ba sira ne’ebé auto-kuarentena mak otél Vila Verde no Timor Resorts.
Pasajeiru sira ne’ebé mak tama iha loron 20 no 21 janeiru, nia dehan, ekipa vizilánsia no ekipa laboratóriu halo kedan swab, tanba normalmente pasajeiru sira tama mai liu loron 10 mak foti swab, maibé iha kazu ida ne’e, pasajeiru sira ne’ebé tama, maioria balun iha sertifikadu teste ne’ebé expire no balun laiha sertifikadu teste.
Nia hatutan, ho ida ne’e maka iha loron 21 ekipa hasai swab uluk ba maluk sira hamutuk na’in-30, hosi 30 ne’e detekta na’in-11 mak pozitivu COVID-19 no iha sesta (22/01) kalan, transporta kedan ba sala izolamentu Vera Cruz, hodi aumenta pasiente ne’ebé baixa hamutuk na’in-14.
“Ita mós deklara ba públiku katak, iha timor-oan na’in tolu rekoperadu, signifika katak sira na’in tolu teste dala-rua tutuir-malu negativu. Ita fó alta ba sidadaun na’in tolu ne’e, na’in rua mak mai hosi UK mai Timor-Leste, inklui médiku ne’ebé mak responsável iha sala izoalmentu, ida ne’e ohin rekopera no fila ba ida-idak nia família,’’ nia relata.
Entretantu, dadus ba loron 23 janeiru 2021, komulativu teste 18.260, hein rezultadu 319, komulativu kazu 64, rekoperadu foun tolu, komulativu rekoperadu 50, aumenta haat hamutuk 54, kazu foun 11, atuál baixa 14.
Rezultadu negativu 18.237, totál kuarentena 266, Dili 137, Munisípiu129, auto-kuarentena 178, Dili 174, Munisípiu haat, pasa ona loron 14, 7.382, Dili 6118, Munisípiu 1.264.
Jornalista: Felicidade Ximenes
Editór: Cipriano Colo
