DILI, 23 janeiru 2021 (TATOLI)— Planu Governu nian liu hosi Ministériu Saúde (MS) atu halo screening masál, pesoál saúde sira sei foti swab, no kualkér sidadaun ne’ebé voluntariamente sei hola parte, tenke aprezenta dokumentu komprovativu hanesan Billete Indentidade (BI) ka Pasaporte.
Koordenadora Jerál Komisaun Nasionál Prevensaun COVID-19, Ministériu Saúde, Odete da Silva Viegas, hateten mekanizmu ida ne’e Ministériu halo atu fasilita pesoál saúde sira, bele fásil lori ba halo teste iha Laboratóriu Nasionál Saúde, iha Bidau.
Notísia Relevante:MS seidauk bele realiza screening masál iha 25 janeiru
“Hosi ne’e, bainhira rezultadu teste mak parte laboratóriu detekta ema ruma pozitivu, ita ba foti diretamente tau iha sala izolamentu no ita haree ninia istória, ema se mak halo kontaku ho nia, ita investiga tuir, foti no lori ba kuarentena. Ida ne’e mak ita planeia ona,’’ Odete ko’alia asuntu ne’e ba jornalista Agência Tatoli, iha Paço Epíscopál Lecidere, sesta ne’e.
Tanba ne’e, parte Ministériu husu ba sidadaun hotu atu aprezneta pasaporte ka Billete identidade bainhira partisipa iha programa ne’e.
“Bainhira sira hakarak halo swab ita foti, maibé bainhira sira lakohi entaun ita labele obriga,” nia subliña.
Maski nune’e, diretora prestasaun serbisu saúde ne’e fó hanoin katak, ema hotu-hotu hakarak atu hadook aan hosi moras ne’e, tanba ne’e, dalan diak liu hodi evita transmisaun, sidadaun hotu-hotu ho voluntariamente tenke partisipa másimu iha data sertu implementasaun programa ne’ebé Governu sei anunsia.
Sentidu hosi Swab
Koordenadór pilár hitu COVID-19, médiku Nilton da Silva, esplika kona-ba natureza no sentidu loloos hosi teste ne’e katak, teste swab ou PCR, hanesan métodu ida ne’ebé uza hodi detekta genetic material RNA/DNA hosi mikróbiu inklui virus, parasite, baktéria, no fungus (jamur). Koleksaun ou prosedimentu atu rekolla amostra ba teste PCR/swabs ba COVID-19 mak liu hosi swab.
Médiku ne’e hatutan, teste PCR (Polymerase Chain Reaction), mak teste ne’ebé OMS rekomenda hanesan teste akurat liu atu detekta virus SARS CoV-2.
“Amostra ne’ebé uza iha teste PCR ne’e mak múkuza sira ne’ebé foti hosi Inus (nasofaringo) & kakorok (orofaringo). Atu hetan amostra ka mukoza hosi kakorok no inus, pesoál saúde sira sei uza Swab ne’ebé sei hatama ba pasiente nia kakorok no inus atu bele rekolla múkuza sira hosi kakorok no inus,” Nilton esplika detalla.
Bainhira iha ema ida infetadu ho virus SARS CoV 2 ne’ebé kauza moras COVID-19, nia dehan, teste PCR sei detekta matéria jenétika hosi virus SARS CoV 2 nian.
Entretantu, médiku ne’e mós fó sai katak, tipu teste PCR ne’ebé Laboratóriu Nasionál Saúde Uza, detekta matéria jenétika sira ho forma proteina sira espesífiku ba virus SARS CoV 2, hanesan S gene, N gene no Orf1ab.
Tanba ne’e, bainhira teste PCR detekta proteina sira ne’ebé mensiona iha leten, siginifika pasiente ne’ebé pesoál saúde sira halo swab infetadu ho SARS CoV 2.
Notísia Relevante:Detekta sedu, MS sei halo screening masál COVID-19
Jornalista: Felicidade Ximenes
Editór: Cipriano Colo
