DILI, 25janeiru 2021 (TATOLI)—Prezidente Eleitu ba Conselho de Imprensa (CI), Virgílio da Silva Guterres, hateten nomeasaun sira-ne’ebé agora sai membru Conselho de Imprensa (CI) ba oin sei hametin estatutu Conselho de Imprensa nian.
Notísia Relevante: Expedito: “Polítiku mak hili ha’u maibé ha’u la lori mensajen polítika”
“Ha’u hanoin nomeasaun sira-ne’ebé ba iha Conselho de Imprensa ne’e mai hosi komponenete sira hanesan mídia-na’in sira, reprezentante jornalista sira no nomeasaun hosi Parlamentu Nasionál (PN) ninian. Ho nomeasaun sira-ne’e hatudu katak ida-ne’e mak sei reflete rede komunikasaun ne’ebé mak Conselho de Iimprensa sei hato’o no atu hametin. Tanba, ba mídia-na’in sira no prezensa momeasaun sira atu hametin komunikasaun ne’ebé mak iha ona,” Virgílio da Silva Guterres hateten ba Jornalista sira bainhira re-eleitu sai Prezidente CI, iha salaun plenária Conselho de Imprensa, Quintál-Boot, Dili, segunda ne’e.
Nia hateten, sira na’in-lima ne’ebé eleitu ba membru Conselho de Imprensa, la’ós halo impozisaun ruma ba mídia-na’in ka jornalista sira tuir sira-nia hakarak maibé karik iha impozisaun ruma ka buat ne’ebé mak tun ne’e depende ba Lei komunikasaun Sosiál no mós Estatutu CI ne’ebé fó kompetensia ba sira.
Kona-ba komunikasaun entre asosiasaun jornalista sira-nian, nia dehan, Conselho de Imprensa (CI) nu’udar organizasaun no Instituisaun Estadu nian, ne’ebé iha mandatu atu apoia organizasaun no kapasita jornalista sira iha Timor-Leste.
“Buat ne’ebé CI hato’o ne’e mak mídia ka jornalista sira-ne’e servisu atu sai ponte komunikasaun entre ita-nia povu no ukun -na’in sira. Entaun, buat importante ne’ebé hamosu iha jornalizmu ne’e iha buat rua mak ita-nia integridade profisonál no ita-nia solidaridade ba malu entre jornalista sira. La interese hosi instituisaun ka asosiasaun ida ne’ebé maibé sentimentu hanesan profisaun ne’e mak metin, atu nune’e hamutuk enfrenta dezafiu sira-ne’ebé jornalista sira hasoru,” nia hateten.
Entretantu, Reprezentante Mídia-Na’in, Otélio Ote, hatutan durante ne’e ema barak mak ladún intende papél hosi Conselho de Imprensa nian, tanba CI rezolve problema konetudu jornalistiku kona-ba kualidade jornalizmu maibe la rezolve kona-ba problema entre mídia-na’in no traballadór sira.
Ne’ebé, nia dehan, atu rezolve problema entre mídia-na’in no jornalista sira ne’e hosi Sekretáriu Estadu Formasaun profisionál no Empregu (SEFOPE) la’ós Conselho de Imprensa (CI).
“Conselho de Imprensa iha dever mós atu esplika ba mídia-na’in sira hanesan ponte ka médiadór ida. Ita konsentra de’it ba kualidade jornalizmu no ita husu ba mídia-na’in sira nakloke-aan atu partisipa ativu bainhira CI loke dalan ba hakbiit kulidade jornalizmu nian, hotu-hotu tenke mai partisipa treinamnetu no tenke ativu ba programa sira,” Otélio Ote esplika.
Membru Conselho de Imprensa ba periódu 2021-2025 ne’e mak hanesan Benevides Correia Barros no Expedito Dias Ximenes ne’ebé nomea hosi Parlamentu Nasionál, Francisco Belo Simões da no Virgílio da Silva Guterres nu’udar reprezentante jornalista sira-nian, no Otélio Ote reprezentante mídia-na’in sira nu’udar konsilleiru iha CI.
Jornalista: Evaristo Soares Martins
Editór: Cancio Ximenes
