DILI, 25 janeiru 2021 (TATOLI)–Komandu Polísia Munisípiu Dili servisu hamutuk ho Komandu Polísia Munisípiu Baucau detein ona suspeitu “mane forte” ho inisiál EMO ne’ebé ‘foti-subar’ osan no sasán eletrónika iha loja Xineza nian ida iha área Comoro, Dili.
Portavós Komandu Jerál Polísia Nasionál Timor-Leste, (PNTL), Superintendente Xefe, Arnaldo de Araújo konta kronolojia kazu foti-subar sasán akontese iha setembru 2020 liubá, no parte PNTL Eskuadra Dom Aleixo detein tiha suspeitu iha sela polísia, ikusmai iha 10 setembru 2020, suspeitu halai sai hosi sela Aimutin bá subar iha área Lisapat, Ermera, kuaze fulan ida no kontinua bá subar fali iha área Buburaga, Suku Gariuai, Baucau, mak PNTL kaptura hikas.
“Suspeitu ne’e foti-subar sasán depois polísia kaptura tama tiha komarka depois halai sai bá subar fali iha Ermera no kontinua bá subar tan iha Baucau mak polísia kaptura iha domingu (24/01/2021),” Arnaldo ba jornalista liuhosi konferénsia imprensa iha Kuartél Jerál PNTL, Dili, segunda ne’e.
Suspeitu halo asaun tama xineza nia loja hodi foti osan inklui sasán eletrónika hanesan telefone, ne’ebé loja na’in aprezenta keixa ba polísia ho evidénsia liuhosi kámera Closed-Circuit Television (CCTV).
Suspeitu daudaun ne’e sei detein hela iha sela Polísia Munisípiu Baucau durante oras 72 nia laran hodi hein investigasaun no bainhira ramata sei lori fali mai Dili hodi aprezenta ba Ministériu Públiku.
Iha parte seluk, Portavós PNTL ne’e informa katak durante 19-25 janeiru 2021, PNTL rejista insidente 30 resin akontese iha teritóriu Timor-Leste.
Kazu ne’ebé aas liu maka problema asalta malu rejista 12, baku-malu 7, violénsia doméstika 10 no tuda-malu 5. PNTL rejista mós asidente tráfegu hamutuk 29 la rezulta ema mate, maibé vítima sofre kanek kamaan.
Jornalista: Eugénio Pereira
Editór: Xisto Freitas
