DILI, 27 janeiru 2021 (TATOLI)–Governu sei halo alterasaun dahuluk ba dekretu-lei númeru 15/2012, loron 28 marsu kona-ba regulamentu setór telekomunikasaun inklui kriasaun regulamentu administrativa.
Liuhosi reuniaun Konsellu-Ministru (KM), Ministru Transporte no Komunikasaun, José Agustinho da Silva, aprezenta opsaun polítiku-lejizlativa sira.
“Proposta alterasaun dahuluk dekretu-lei ne’e sei iha faze diskusaun no sei diskute hikas iha reuniaun sira tuir mai,” Ministru Preziddénsia Konsellu Ministru, Fidelis Manuel Leite Magalhães, informa hafoin ramata reuniaun ezekutivu iha Palásiu Governu, kuarta ne’e.
Portavós Governu ne’e esklarese, opsaun polítika-lejizlativa ne’e ho objetivu atu altera ka reformula solusaun anteriór balun ne’ebé eziste ona no klarifika konseitu tékniku, jurídiku no tipu prosedimentu regulatóriu sira.
Nune’e mós, klasifika asaun sira ne’ebé sai konduta proibida no esklarese sansaun administrativa sira.
Entretantu, iha dekretu-lei númeru 15/2012, loron 28 marsu, mensiona katak telekomunikasaun esensiál ba dezenvolvimentu futuru Timor-Leste, ba kriasaun empregu, prestasaun servisu iha área vitál hanesan saúde, edukasaun, justisa no orden ba funsionamentu administrasaun.
Mensiona mós katak, rekoñese importánsia merkadu telekomunikasaun kompetitivu, ba futuru sosiál no ekonómiku Timor-Leste, Governu empeña prosesu liberalizasaun merkadu telekomunikasaun no introdús efetiva konkorénsia ba merkadu ne’e, liuhosi partisipasaun setór privadu.
Nune’e, hanesan parte husi prosesu ne’e, Governu estabelese kuadru legál telekomunikasaun no kria autoridade nasionál ba telekomunikasaun, ho atribuisaun devér no kompeténsia nesesária atu esegura implementasaun.
Autoridade Nasionál Komunikasaun (ANC, sigla portugés) hanesan institutu públiku ida ho personalidade jurídika no adota autonomia administrativa no finanseira, orsamentu no patrimóniu própriu, ne’ebé ezerse funsaun hanesan entidade reguladora ba setór telekomunikasaun.
Jornalista: Antónia Gusmão
Editora: Julia Chatarina
