DILI, 28 janeiru 2021 (TATOLI) – Klube Boavista FC Timor ho Karketu Dili FC, daudaun ne’e, tau matan no hakarak hotu atu dada Gelvanio Marcal “Abaty” atu reforsa klube rua ne’e ida.
Klube rua ne’e “hadau malu” jogadór selesaun nasionál ne’e tanba agora daudaun livre hela kontratu hosi Karketu rasik.
“Klube rua ne’e kontaktu hotu hela ha’u. Ha’u seidauk hatene loos atu deside ida ne’ebé. Boavista fó ona kontratu ha’u haree, Karketu mós fó hotu ona kontratu, mas Karketu nian sei fó tan kontratu segundu karik kontratu segundu la monu ba ha’u nia laran mak ha’u sei ba Boavista,” Abaty hateten ba Agência
TATOLI iha kampu Federasaun Futeból Timor-Leste (FFTL), Dili, kinta ne’e.
Abaty seidauk deside loloos atu ba klube ida ne’ebé no nia hakarak liu atu ba Boavista karik kontratu Karketu la monu ba nia laran.
Abaty hanesan jogadór prinsipál iha Karketu Dili FC iha époka hira ba kotuk Liga Futeból Amadora (LFA), Tasa 12 Novembru, supertasa no kopa FFTL.
Hosi sorin seluk, Sekretáriu Jerál Karketu, Elizeu Isaac, konfesa katak Abaty hanesan família ona ho Karketu ho nune’e sei la fó sai ba klube seluk.
“Karketu iha inísiu hateten ona jogadór hamutuk na’in-14, inklui Abaty ne’ebé hamutuk ho klube ba joga iha tasa 12 Novembru, kopa FFTL, Karketu sei la husik sai. Abaty intermus jogadór nia mós hanesan ona família ba ekipa boot matak malirin,” Elizeu hateten.
Nia dehan, kestaun Abaty seidauk asina kontratu ho Karketu tanba jestór klube normalmente nunka informa sai uluk ba publiku no nia relata Abaty nafatin iha Karketu.
Iha parte seluk, na’in ba Boavista, Cicu Gusmão, hateten buat hotu depende ba Abaty no nia mak deside se ba Boavista sira sei simu.
“Ami depende ba Abaty. Ami komunika ona nia tanba haree ba nia jogadór di’ak ida desizaun hotu fila ba nia,” dehan Cicu Gusmão.
Jornalista : Hortencio Sanchez
Editór : Francisco Simões
