DILI, 28 janeiru 2021 (TATOLI) – Sekretária Estadu Juventude no Desportu (SEJD) kontrata ona JU,S Jurídiku Sosiál hodi prepara pakote lejizlasaun foun ba arte marsiál.
Sekretáriu Estadu Juventude no Desportu, Abrão Saldanha, hateten, J,US prodús lejizlasaun ida-ne’e tanba sira mak manan konkursu públiku ho valor orsamentu $36,000.00.
“Ami deside lori ba konkursu tanba ita-nia rai ne’e komesa iha ona estrutura advogadu lubuk ida. Entaun iha konkursu ne’e konkorrente na’in-hitu mak tuir no ekipa avaliasaun halo to’o vizita ba sira-nia fatin no ekipa juri rekomenda kompañia J,US Jurídiku Sosiál mak manan no semana kotuk asina ona kontratu servisu,” Abrão Saldanha, informa ba Agência TATOLI iha edifísiu SEJD, Lecidere, Dili, kinta ne’e.
Nia dehan, agora SEJD sei prepara prosesu internu hosi Governu nian atu konstitui ekipa ministerial para hamutuk ho konsultóriu jurídiku ne’e hodi hamutuk ho Governu hodi diskute pakote lei foun ba arte marsiál nian.
“Sira nia servisu mak atu halo lei hodi bele ba aprova iha Parlamentu Nasionál no Konsellu Ministru. Iha kontratu ne’e, ami tau fulan-tolu,” nia hateten.
Antes ne’e SEJD iha asesór ba jurídiku nian, maibé tanba lei arte marsiál nian ne’e asuntu dimensional ho nune’e presiza kontrata konsultóriu hodi bele responde ba lejizlasaun sira ho karater dimensional.
Jornalista : Hortencio Sanchez
Editór : Francisco Simões
