DILI, 29 janeiru 2021 (TATOLI)-–Diretór Nasionál Estrada, Ponte no Konstrolu Cheia, João Mario Gama de Sousa, informa konstrusaun estrada nasionál ligasaun Baucau bá Viqueque ne’ebé halo husi kompañia internasionál, China Overseas Engineering Group (COVEC) atinje ona 25%.
Projetu estrada ne’e ho durasaun serbisu tinan-tolu, hahú husi agostu 2019 to’o fevereiru 2022, ho totál orsamentu hamutuk millaun $44, ho naruk kilómetru 58, kompostu husi trosu 1 kilómetru 23,38 dirasaun Baucau bá Venilale no trosu 2 kilómetru 34,62 ho dirasaun Venilale bá Viqueque.
“Kompañia konstrui ona ita-nia estrada faze dahuluk dirasaun Baucau bá Venilale atinje 10% no husi Venilale bá Viqueque kuaze 15%, ne’ebé totál konstrusaun 25% ona,” Diretór Nasionál João Mário, informa ba Agência TATOLI iha ninia knaar fatin, Comoro, sesta ne’e.
Notísia relevante: COVEC Hahú Hikas Konstrusaun Estrada Ligasaun Baucau-Viqueque Trosu 1
Governu liuhosi Ministériu Obra Públika (MOP) entrega uluk rai kilómetru 20, husi Baucau bá Venilale kilómetru 10 no Venilale bá Viqueque kilómetru 10.
Diretór Nasionál ne’e dehan, kontrusaun ne’e tenke pur tapa, tanba abitante barak mak afetadu, ne’ebé ekipa Unidade Jestaun Projetu (PMU, sigla inglés) no MOP halo identifikasaun uluk hodi indemniza afetadu hafoin entrega ba empreza.
“Daudaun kompañia COVEC hahú aterru ona no konstrui barrajen inklui bee dalan sira, hafoin bele tau aspál tanba kuaze rai barak maka seidauk livre tanba iha abitante afetadu sira,” nia akresenta.
PMU-MOP halo ona prosesu konsultasaun públika hodi disemina padraun ne’ebé Governu iha atu fó kompensasaun.
“Ami seidauk hatene totál abitante afetada no orsamentu ba indemnizasaun tanba sei iha faze indetifikasaun,” nia hatutan.
Indemnizasaun ba abitante afetada ne’ebé aprova iha 18 jullu 2014, ba uma temporária, semi-permanente, permanente normál no luxu sei selu kada metru kuadradu hahú husi $40 to’o $150.
Ai-teka selu tuir idade, hahú kada hun ida $5 to’o $30, ai-mahoni kada hun $3 to’o $25, ai-kameli hun ida $10 to’o $60, nuu kada hun ida ho kustu $25 to’o $60, ai-kalju ho kustu $15, ai-kakao $15, bua $25, malus unidade ida $5, kamii $35, aidila hun ida $5, hudi hun ida $15, sabraka hun ida $10, kulu jaka hun ida $15 inklui ba presu modo jerál hahú husi $0,20 to’o $20.
Lansamentu fatuk dahuluk ba konstrusaun estrada nasionál ligasaun Baucau-Viqueque, trosu 1 Baucau bá Venilale, hala’o husi Ministru Obra Públika, Salvador Eugênio Soares dos Reis Pires, iha loron 09 agostu 2019.
Orsamentu ba projetu estrada ne’e mai husi fundu empréstimu husi Banku Aziátiku Dezenvolvimentu (ADB, sigla inglés).
Jornalista: Florêncio Miranda Ximenes
Editora: Julia Chatarina
