DILI, 29 janeiru 2021 (TATOLI)–Ministériu Públiku (MP) liuhosi Prokuradór Jerál Repúblika (PJR), José da Costa Ximenes, submete ona proposta-lei sibernétika ba ba Parlamentu Nasionál (PN).
Notísia Relevante: Projetu lei krime sibernétika regula mós utilizasaun mídia sosiál
“Proposta-lei kona-ba cyber crime ne’ebé submete hosi Ministériu Públiku mai iha Parlamentu Nasionál entaun ohin líder bankada parlamentár sira hetan ona kópia ba proposta-lei ida-ne’e,” Sekretária Meza Parlamentu Nasionál, Deputada Lídia dos Santos Martins, informa liuhosi konferénsia imprensa, iha Parlamentu Nasionál, sesta ne’e.
Nia dehan, proposta-lei oras ne’e deputadu sira sei halo análize hafoin halo ajendamentu.
Tuir Organizasaun ba Dezenvolvimentu Komunidade Europeia (OCDE-sigla portugés), katak cyber crime nu’udar forma asesu ilegál ba transmisaun dadus sira ka forma atividade ilegál ba sistema komputadór no informasau falsu sira.
Definisaun sibernétiku definida krime iha siber espasu ne’ebé utiliza teknolojia komputadór rede internet no kombate informasau falsu sira.
Ezemplu hanesan falsifika konta falsu iha facebook, roubu (foti subar) dadus, terrorizmu sibernétiku no seluk tán.
Jornalista: Evaristo Soares Martins
Editór: Cancio Ximenes
