DILI, 29 janeiru 2021 (TATOLI)—Relasiona ho obrigasaun kréditu Asu’ain (funu-na’in) iha Banku Nasionál Komérsiu Timor-Leste (BNCTL), iha ámbitu pagamentu subsídiu ba veteranu iha fulan-janeiru 2021, dirijente banku husu kliente labele hamamuk saldo iha konta bankária.
“Bainhira halo levantamentu ita-boot sira-nia direitu, husu atu labele foti hotu osan iha konta no husu atu husik hela montante ne’ebé mak banku sei ko’a hodi selu kréditu Asu’ain ,” refere nota ofisiál husi BNCTL, ne’ebé Agência TATOLI asesu iha sesta ne’e.
Nune’e, banku nasionál ne’e apela, kliente ne’ebé foti hotu ona subsídiu atu depozita hikas montante atu selu obrigasaun kréditu.
“Bainhira ita-boot sira foti hotu osan no la re-depozita hikas, maka BNCTL sei ko’a hotu ita-boot sira-nia direitu ba subsídiu iha fulan sira tuir mai,” subliña nota ne’e.
Notísia relevante: SEACLN Esklarese Governu Ko’a Veteranu Nia Osan $30.00
Veteranu Aseita Governu Koa Osan Pensaun
Hahú janeiru 2020 liubá, Governu hahú ko’a osan ho valór $30 ba kada veteranu hodi kontribui ba kriasaun fundu investimentu ba veteranu atu garante sustentabilidade fundu iha futuru.
Polítika Governu ne’e, atu garante kualidade moris veteranu, liuhosi investimentu ida hodi husik hela ba jerasaun veteranu sira iha futuru.
Antes implementa polítika ne’e, Sekretaria Estadu Antigu Kombatente Libertasaun Nasionál (SEACLN, sigla portugés) halo ona sensibilizasaun ba veteranu iha munisípiu hotu inklui iha nasionál, ne’ebé sai benefisiáriu simu pensaun husi Estadu hodi hetan aseitasaun.
Nune’e mós, liuhosi kongresu nasionál dahuluk kombatente libertasaun nasionál, aprova ona deliberasaun iha loron 21 dezembru 2019, hodi fó kbiit ba SEACLN atu hahú implementa polítika kriasaun fundu investimentu ba veteranu.
Jornalista: Antónia Gusmão
Editora: Julia Chatarina
